ఎన్ఎండీసీ టీపీజీఎల్ సీజన్‌-6 గోల్ఫ్ టోర్నీ ప్రారంభం టీ-ఆఫ్ చేసి ప్రారంభించిన డీజీపీ సీవీ ఆనంద్‌
హైదరాబాద్, మేజర్ న్యూస్ ప్రతినిధి : హైదరాబాద్ గోల్ఫ్ అసోసియేషన్‌ (హెచ్‌జీఏ) వేదికగా ఎన్ఎండీసీ టీపీజీఎల్ సీజన్‌-6 గోల్ఫ్ టోర్నమెంట్‌ లీగ్‌ మ్యాచ్‌లు ప్రారంభమయ్యాయి. తెలంగాణ డీజీపీ సీవీ ఆనంద్‌ ఐపీఎస్‌ లాంఛనంగా టీ-ఆఫ్ చేసి టోర్నీని ప్రారంభించారు. ఈ సీజన్‌లో 16 జట్లకు చెందిన 192 మంది క్రీడాకారులు పోటీపడుతున్నారు. ఈ సందర్భంగా డీజీపీ మాట్లాడుతూ, వివిధ స్థాయుల క్రీడాకారులు పోటీపడేందుకు అవకాశం కల్పించే ఈ టోర్నమెంట్‌ విధానం అభినందనీయమన్నారు. క్రీడాకారులందరికీ శుభాకాంక్షలు తెలిపారు.
హెచ్‌జీఏ అధ్యక్షుడు భాస్కర్‌ ఎ. రెడ్డి మాట్లాడుతూ, క్రీడాకారులు క్రీడాస్ఫూర్తితో పోటీపడుతూ గోల్ఫ్ ఆటను ఆస్వాదించాలని కోరారు. ఐదు క్వాలిఫైయింగ్‌ రౌండ్లలో ఐదు విభిన్న ఫార్మాట్లలో పోటీలు నిర్వహించనున్నట్లు టీపీజీఎల్ కమిషనర్‌ సంజయ్‌ కమటం వెల్లడించారు. ఈ ఫార్మాట్లు క్రీడాకారుల నైపుణ్యాలు, వ్యూహరచన, జట్టు సమన్వయాన్ని పరీక్షిస్తాయని తెలిపారు.
కార్యక్రమంలో హెచ్‌జీఏ గౌరవ కార్యదర్శి వందిత్‌ రెడ్డి, కెప్టెన్‌ జెస్సీ బిర్గి, కోర్స్‌ ఛైర్మన్‌ హేమంత్‌ రెడ్డి, టోర్నమెంట్‌ ఛైర్మన్‌ సందీప్‌ రాథీ తదితరులు పాల్గొన్నారు.
