ఏఐకేఎస్‌ జాతీయ మహాసభల ప్రచార జాత ప్రారంభించిన డబ్బికార్ మల్లేష్
మిర్యాలగూడ అర్బన్, మేజర్ న్యూస్:
నల్లగొండలో నిర్వహించనున్న అఖిల భారత రైతు సంఘం (ఏఐకేఎస్‌) జాతీయ మహాసభల ప్రచారంలో భాగంగా మిర్యాలగూడ పట్టణంలో గురువారం ప్రచార జాతను సీపీఐ(ఎం) రాష్ట్ర కమిటీ సభ్యులు డబ్బికార్ మల్లేష్ ప్రారంభించారు.
ఈ సందర్భంగా ఆయన మాట్లాడుతూ.. జాతీయ మహాసభల ప్రాధాన్యతను ప్రజలకు వివరించేందుకు డివిజన్ వ్యాప్తంగా మూడు ప్రచార జాతాలు నిర్వహించనున్నట్లు తెలిపారు. ఈ జాతాల ద్వారా రైతాంగ సమస్యలు, సాగునీటి ప్రాజెక్టుల పెండింగ్ పనులు, రైతుల హక్కుల సాధన తదితర అంశాలపై ప్రజలకు అవగాహన కల్పిస్తామన్నారు.
జాతీయ మహాసభల్లో సాగునీటి ప్రాజెక్టులను త్వరితగతిన పూర్తి చేయడం, రైతుల సమస్యల పరిష్కారం, రైతాంగ హక్కుల సాధన వంటి అంశాలపై విస్తృతంగా చర్చించనున్నట్లు పేర్కొన్నారు. భవిష్యత్తులో రైతాంగ ఉద్యమాలకు కార్యాచరణ రూపొందించనున్నట్లు తెలిపారు.
ఈ కార్యక్రమంలో రైతు సంఘం జిల్లా కార్యదర్శి వీరేపల్లి వెంకటేశ్వర్లు, సీపీఎం జిల్లా కమిటీ సభ్యులు రవి నాయక్, పట్టణ కార్యదర్శి మల్లు గౌతమ్ రెడ్డి, నాయకులు కోడి రెక్క మల్లయ్య, కేశవులు, రవి, గోవిందరెడ్డి తదితరులు పాల్గొన్నారు.
