telangana
డ్రగ్స్ కేసులో ఎల్బీనగర్ ఎమ్మెల్యే సుధీర్ రెడ్డి అనుచరుడి అరెస్ట్..
హైదరాబాద్/అంబర్పేట, నవంబర్ 20: హైదరాబాద్లోని ఎల్బీనగర్ ఎమ్మెల్యే దేవిరెడ్డి సుధీర్ రెడ్డి అనుచరుడు చిట్టబోయిన వేణుగోపాల్ యాదవ్ మాదకద్రవ్యాల (డ్రగ్స్) కేసులో పోలీసులకు చిక్కడం నగర రాజకీయాల్లో కలకలం రేపుతోంది.
ఈ నెల 6న అంబర్పేట పోలీసులు స్థానిక డెల్టా కళాశాల సమీపంలో నిర్వహించిన తనిఖీల్లో వేణుగోపాల్ యాదవ్ పట్టుబడ్డాడు. అతడిని సోదా చేయగా 15 గ్రాముల ఎండీఎంఏ (MDMA) డ్రగ్స్ లభ్యమైనట్లు పోలీసులు గుర్తించారు. ఈ కేసులో వేణుగోపాల్తో పాటు ముఠాకు చెందిన మరో ఇద్దరు సభ్యులను కూడా పోలీసులు అదుపులోకి తీసుకున్నారు. నిందితులు ముగ్గురిపై కేసు నమోదు చేసి న్యాయస్థానంలో హాజరుపరచగా, కోర్టు వారికి 14 రోజుల జ్యుడీషియల్ రిమాండ్ విధించింది. దీంతో నిందితులను జైలుకు తరలించారు.
కాగా, నియోజకవర్గంలో డ్రగ్స్, గంజాయి ముఠాలను ఎమ్మెల్యే సుధీర్ రెడ్డి ప్రోత్సహిస్తున్నారని, యువతను మత్తు పదార్థాలకు బానిసలుగా మారుస్తున్నారని ఇప్పటికే రాజకీయ ప్రత్యర్థులు ఆయనపై తీవ్ర ఆరోపణలు చేస్తున్నారు. తాజాగా ఆయన ముఖ్య అనుచరుడే నేరుగా డ్రగ్స్తో పట్టుబడటంతో ఎమ్మెల్యేపై ప్రతిపక్షాల విమర్శలు మరింత ఎక్కువయ్యాయి.