సూర్య నిర్మల్ జిల్లా ప్రతినిధి : నీటిపారుదల శాఖ భూముల ఆక్రమణలను సహించేది లేదని, ప్రభుత్వ భూములను పరిరక్షించేందుకు అధికారులు నిరంతరం పర్యవేక్షణ చేపట్టాలని కలెక్టర్ భవేశ్ మిశ్రా ఆదేశించారు.నిర్మల్ పట్టణంలోని ధర్మసాగర్ చెరువు ఎఫ్‌టీఎల్‌ పరిధిలో ఆక్రమణలను పరిశీలించిన కలెక్టర్, అక్రమ వెంచర్‌ నిర్మాణాలను తక్షణమే తొలగించాలని సూచించారు. నిబంధనల ప్రకారం సంబంధిత వ్యక్తులకు నోటీసులు జారీ చేసి చర్యలు తీసుకోవాలని ఆదేశించారు. ఈ మేరకు చెరువు పరిధిలో నిర్మించిన లేఅవుట్‌ ఫెన్సింగ్‌ గోడను అధికారులు కూల్చివేశారు.
చెరువులు, నీటిపారుదల శాఖ భూముల ఆక్రమణలను గుర్తించి, ప్రభుత్వ భూముల పరిరక్షణకు సంబంధిత శాఖల అధికారులు సమన్వయంతో పనిచేయాలని కలెక్టర్ స్పష్టం చేశారు. ఈ కార్యక్రమంలో నీటిపారుదల శాఖ ఈఈ అనిల్‌, మున్సిపల్‌ కమిషనర్‌ రవిబాబు, తహశీల్దార్‌ రాజు తదితరులు పాల్గొన్నారు.
