చింతల్ దర్గా షరీఫ్ ఉర్స్ వేడుకల్లో పాల్గొన్న ఎమ్మెల్యే కేపీ వివేకానంద్

కుత్బుల్లాపూర్ మేజర్ న్యూస్ :128వ చింతల్ డివిజన్ పరిధిలోని దర్గా షరీఫ్‌లో హజ్రత్ జిందా షాహ్ మదార్ (ఆర్.ఏ.) ఉర్స్-ఎ-షరీఫ్ వేడుకలు శుక్రవారం ఘనంగా నిర్వహించారు. ఈ ఉత్సవాల్లో భాగంగా నిర్వహించిన చిరాగ్, కవ్వాలి కార్యక్రమాలకు బీఆర్ఎస్ శాసనసభాపక్ష విప్, కుత్బుల్లాపూర్ ఎమ్మెల్యే కేపీ వివేకానంద్ ముఖ్య అతిథిగా హాజరయ్యారు. ఈ సందర్భంగా దర్గాలో ప్రత్యేక ప్రార్థనలు నిర్వహించి ఉర్స్ వేడుకల్లో పాల్గొన్నారు. అనంతరం ఎమ్మెల్యే కేపీ వివేకానంద్ మాట్లాడుతూ హైదరాబాద్ నగరం గంగా జమునా తహజీబ్‌కు ప్రతీకగా నిలుస్తుందని పేర్కొన్నారు. అన్ని మతాల ప్రజలు పరస్పర గౌరవం, సోదరభావం, మతసామరస్యంతో కలిసి మెలిసి జీవించాలని ఆకాంక్షించారు. మతాలకు అతీతంగా ప్రజల మధ్య ఐకమత్యం కొనసాగాలని, ప్రతి ఒక్కరూ సుఖసంతోషాలతో ఉండాలని కోరుకున్నట్లు తెలిపారు. ఇలాంటి ఆధ్యాత్మిక కార్యక్రమాలు సమాజంలో సోదరభావాన్ని, ఐక్యతను పెంపొందిస్తాయని పేర్కొన్నారు. ఈ కార్యక్రమంలో కార్పొరేటర్ విజయ్ శేఖర్ గౌడ్, డివిజన్ అధ్యక్షుడు ఎర్వ శంకరయ్య, మసీదు కమిటీ అధ్యక్షుడు ఎండీ అబ్దుల్ ఖాదర్, సలహాదారులు ఎండీ సిరాజ్, ఎండీ రషీద్, ఎండీ రియాజ్, కమిటీ సభ్యులు బాబుమియా, గౌస్ భాయ్, వాజిద్, షేక్ అలీ, సీనియర్ నాయకులు ఫెరోజ్, బస్వరాజ్, ఆకుల ప్రభాకర్ గుప్తా, జల్దా లక్ష్మీనాథ్, మంజూర్ అలీ, సతీష్ గట్టోజి, మెహరున్నిసా బేగం, జునైద్, శౌకత్ అలీ, రమ్మీ గౌడ్, అల్లావుద్దీన్, ఇర్ఫాన్, ఇస్మాయిల్ తదితరులు పాల్గొన్నారు.