చట్టాలపై అవగాహనతోనే హక్కులకు రక్షణ

సూర్య, మందమర్రి. విద్యార్థులు తమ హక్కులు, బాధ్యతలపై అవగాహన పెంపొందించుకోవడంతో పాటు, చట్టాలను గౌరవిస్తూ బాధ్యతాయుత పౌరులుగా ఎదగాలని చీఫ్ లీగల్ ఎయిడ్ డిఫెన్స్ కౌన్సిల్ ఎం.డి. సంధాని, ఆర్. శ్రీనివాస్, సబ్బాని సదయ్య, ఎ. రాములు సూచించారు. గురువారం మందమర్రి ప్రభుత్వ జూనియర్ కళాశాలలో మంచిర్యాల జిల్లా లీగల్ ఎయిడ్ డిఫెన్స్ కౌన్సిల్ సిస్టం ఆధ్వర్యంలో నిర్వహించిన న్యాయ అవగాహన కార్యక్రమంలో వారు విద్యార్థులకు పలు చట్టాలపై వివరించారు. కళాశాల ప్రిన్సిపాల్ కె. శ్రీనివాసరావు అధ్యక్షతన జరిగిన ఈ కార్యక్రమంలో పోక్సో చట్టం, ర్యాగింగ్ నిరోధక చట్టం, బాల్యవివాహాల నిషేధ చట్టం, కార్మిక చట్టాలు, మోటారు వాహనాల చట్టాల ప్రాధాన్యతను వివరించారు. చట్టాల ఉల్లంఘన వల్ల ఎదురయ్యే పరిణామాలు, బాధితులకు చట్టపరంగా లభించే రక్షణ, న్యాయ సహాయం పొందే మార్గాలపై అవగాహన కల్పించారు. ఈ సందర్భంగా వారు మాట్లాడుతూ చట్టాలపై అవగాహన కలిగి ఉండటం ద్వారా అన్యాయాన్ని ఎదుర్కొనే ధైర్యం వస్తుందని పేర్కొన్నారు. విద్యార్థులు ర్యాగింగ్‌కు పాల్పడకుండా, బాల్యవివాహాలను ప్రోత్సహించకుండా ఉండాలని, రహదారి భద్రతా నియమాలను తప్పనిసరిగా పాటించాలని సూచించారు. ఎవరైనా అన్యాయానికి గురైతే మౌనంగా ఉండకుండా, భయపడకుండా సంబంధిత అధికారులను సంప్రదించి న్యాయ సహాయం పొందాలని తెలిపారు. ఈ కార్యక్రమంలో కళాశాల అధ్యాపకులు, విద్యార్థులు పాల్గొన్నారు.