బియ్యం షాపులపై అధికారుల దాడులు..

కూకట్‌పల్లిలో బియ్యం వ్యాపారులపై పౌరసరఫరాల శాఖ అధికారులు కొరడా ఝుళిపించారు. పలు బియ్యం దుకాణాలు, హోల్‌సేల్ వ్యాపారుల వద్ద అధికారులు ఆకస్మిక తనిఖీలు నిర్వహించారు. ఈ సందర్భంగా నిర్ణయించిన గరిష్ఠ చిల్లర ధర (ఎంఆర్‌పీ) కంటే అధిక ధరలకు బియ్యం విక్రయిస్తున్నట్లు గుర్తించినట్లు సమాచారం. దుకాణాల్లో ఉన్న బియ్యం నిల్వలు, స్టాక్ రిజిస్టర్లు, విక్రయ ధరలను అధికారులు క్షుణ్ణంగా పరిశీలించారు. నిబంధనలకు విరుద్ధంగా అధిక ధరలకు బియ్యం విక్రయించడంపై అధికారులు ఆగ్రహం వ్యక్తం చేశారు. వినియోగదారుల నుంచి అధిక ధరలు వసూలు చేస్తే ఉపేక్షించేది లేదని స్పష్టం చేశారు. నిర్ణీత ధరలకే బియ్యం విక్రయించాలని, నిబంధనలు ఉల్లంఘించే వ్యాపారులపై కఠిన చర్యలు తీసుకుంటామని హెచ్చరించారు. వినియోగదారులు కూడా బియ్యం కొనుగోలు సమయంలో ధరలను పరిశీలించాలని, అధిక ధరలు వసూలు చేస్తే సంబంధిత అధికారులకు ఫిర్యాదు చేయాలని సూచించారు.