జర్మనీని తాకిన జెన్-జీ నిరసనల హోరు

సూర్య అంతర్జాతీయ డెస్క్: యూరప్ వ్యాప్తంగా యువతలో వ్యక్తమవుతున్న అసంతృప్తి క్రమంగా జర్మనీ దేశానికి కూడా పాకింది. మెరుగైన విద్యా వసతులు మరియు పెరుగుతున్న జీవన వ్యయం నుంచి ఉపశమనం కల్పించాలని డిమాండ్ చేస్తూ జర్మనీ వ్యాప్తంగా యువత రోడ్డెక్కుతోంది. హాలోవీన్ పండుగ రోజున దేశంలోని దాదాపు 34 నగరాలలో భారీ ప్రదర్శనలు మరియు ర్యాలీలు నిర్వహించేందుకు ఏర్పాట్లు జరుగుతున్నాయి. ఈ నిరసనల్లో సుమారు 1.6 లక్షలకు పైగా జెన్-జీ (జెనరేషన్ జెడ్) యువత మరియు విద్యార్థులు పెద్ద ఎత్తున పాల్గొనే అవకాశం ఉందని నిర్వాహకులు అంచనా వేస్తున్నారు. యూరప్ దేశాలలో గత కొంతకాలంగా వేళ్లూనుకుంటున్న ఈ యువత నేతృత్వంలోని ఉద్యమం జర్మనీకి చేరడం ఆ దేశ రాజకీయ వర్గాల్లో తీవ్ర కలవరం సృష్టిస్తోంది.

జర్మనీలోని అనేక విశ్వవిద్యాలయాలు మరియు పాఠశాలల్లో మౌలిక వసతులు పూర్తిగా క్షీణించాయని, తరగతి గదులు శిథిలావస్థకు చేరినట్లు విద్యార్థులు తీవ్ర ఆవేదన వ్యక్తం చేస్తున్నారు. చదువుకోవాల్సిన ప్రదేశాలు పాడుబడిన భవనాలను తలపిస్తున్నాయని, అయినప్పటికీ ప్రభుత్వాలు విద్యారంగాన్ని విస్మరిస్తున్నాయని ఆందోళనకారులు మండిపడుతున్నారు. ద్రవ్యోల్బణం విపరీతంగా పెరగడం వల్ల సామాన్య కుటుంబాల యువత ఉన్నత చదువులు అభ్యసించడం భారంగా మారిందని వారు ఆరోపిస్తున్నారు. విద్యారంగంలో సంస్కరణలు తేవాలని, విద్యార్థులకు మెరుగైన భవిష్యత్తును అందించాలని నినాదాలు చేస్తూ ఈ ర్యాలీలను నిర్వహిస్తున్నట్లు విద్యార్థి సంఘాలు స్పష్టం చేశాయి.

యూరప్ అంతటా ప్రస్తుతం యువత తమ హక్కుల కోసం స్వరం గట్టిగా వినిపిస్తోంది. ఇప్పటికే కొన్ని దేశాలలో విద్యార్థి ఉద్యమాలు ప్రభుత్వ విధానాలను మార్చడంలో కీలక పాత్ర పోషించగా, ఇప్పుడు జర్మనీలోనూ అదే జోరు కనిపిస్తోంది. శాంతియుతంగా నిరసనలు తెలుపుతున్నప్పటికీ, ప్రభుత్వం నుంచి స్పష్టమైన హామీ వచ్చే వరకు తమ ఆందోళనలను ఆపేది లేదని యువత తేల్చిచెబుతోంది. హాలోవీన్ వేడుకల నేపథ్యంలో మునుపెన్నడూ లేని విధంగా వేలాది మంది యువకులు వీధుల్లోకి వస్తుండటంతో జర్మనీ యంత్రాంగం అప్రమత్తమైంది. ఎలాంటి అవాంఛనీయ ఘటనలు జరగకుండా ప్రధాన నగరాల్లో భారీ భద్రతా ఏర్పాట్లు చేపట్టింది.