స్పానిష్ వేదికపై సంచలనం సృష్టించిన 90 ఏళ్ల జపాన్ బాడీబిల్డర్
సూర్య క్రీడా డెస్క్: శారీరక దారుఢ్యానికి వయసుతో ఎలాంటి సంబంధం లేదని నిరూపిస్తూ తొంబై ఏళ్ల వయసులోనూ ఓ వ్యక్తి అంతర్జాతీయ వేదికపై అద్భుతం సృష్టించారు. జపాన్‌కు చెందిన ప్రముఖ నాజెనేరియన్ బాడీబిల్డర్ తోషిసుకే కనజవా స్పానిష్ గడ్డపై జరిగిన ప్రపంచ స్థాయి ఛాంపియన్‌షిప్‌లో పాల్గొని అందరినీ ఆశ్చర్యపరిచారు. స్పెయిన్‌లోని కోస్టా డెల్ మారెస్మే వేదికగా జరుగుతున్న ఫిట్‌నెస్ అండ్ బాడీబిల్డర్ పోటీలలో ఆయన ఉత్సాహంగా అడుగుపెట్టారు. తన కంటే దశాబ్దాల వయసులో చిన్నవారైన యవత పోటీదారులతో హోరాహోరీగా తలపడుతూ ఈ వయసులోనూ అసాధారణ ఫిట్‌నెస్‌ను ప్రదర్శించి క్రీడాభిమానులను మంత్రముగ్ధులను చేశారు.
గతంలో దిగ్గజ క్రీడాకారుడు ఆర్నాల్డ్ స్వార్జ్‌నెగ్గర్ వంటివారితో కలిసి పోటీపడిన చరిత్ర ఉన్న కనజవా, నేటికీ తన కఠినమైన క్రమశిక్షణను కొనసాగిస్తున్నారు. వయసు పెరుగుతున్న కొద్దీ శారీరక మార్పులను సానుకూలంగా స్వీకరిస్తూనే, మానసిక దృఢత్వంతో ఈ స్థాయికి చేరుకున్నట్లు ఆయన తెలిపారు. రోజూ క్రమం తప్పకుండా వ్యాయామం చేయడం, సరైన నిద్ర మరియు సంప్రదాయ జపనీయ ఆహారపు అలవాట్లే తన నిరంతర ఆరోగ్యానికి అసలైన రహస్యమని ఆయన వెల్లడించారు. బ్రౌన్ రైస్, నాట్టో, మిసో సూప్ వంటి సమతుల్య ఆహారాన్ని తీసుకుంటూ గత తొంబై ఏళ్లుగా తాను ఒక్కసారి కూడా తీవ్ర అనారోగ్యం బారిన పడలేదని ఆయన గర్వంగా పేర్కొన్నారు.
తొంబై ఏళ్ల వయసులోనూ అంతర్జాతీయ పోటీల బరిలోకి దిగడం ద్వారా ప్రపంచవ్యాప్తంగా ఉన్న వృద్ధులకు మరియు యువతకు ఆయన సరికొత్త స్ఫూర్తిని ఇస్తున్నారు. ఏ వయసులోనైనా లక్ష్యాన్ని నిర్దేశించుకుని దాని కోసం కష్టపడితే అసాధ్యమైనది అంటూ ఏదీ ఉండదని నిరూపించి చూపారు. ఈ పోటీల అనంతరం మరో రెండు సంవత్సరాలు సాధన చేసి, తన 93వ ఏట చివరిసారిగా బాడీబిల్డింగ్ స్టేజీపైకి వచ్చి పోటీల నుంచి అధికారికంగా రిటైర్మెంట్ తీసుకోవాలని యోచిస్తున్నట్లు ఆయన స్పష్టం చేశారు. కనజవా పట్టుదల, క్రీడపై ఆయన చూపుతున్న అంకితభావం చూసి ప్రపంచ క్రీడా లోకం హ్యాట్సాఫ్ చెబుతోంది.
