భారీ వర్షానికి తడిసిన వరి ధాన్యం.. కన్నీరు పెడుతున్న రైతన్న

కొల్చారం;మెదక్ జిల్లా కొల్చారం మండల కేంద్రంలో శనివారం కురిసిన భారీ వర్షం రైతులకు తీవ్ర నష్టాన్ని మిగిల్చింది. ఓవైపు వరి ధాన్యం కొనుగోళ్లలో జాప్యం, మరోవైపు అకస్మాత్తుగా కురిసిన భారీ వర్షంతో రైతులు తీవ్ర ఇబ్బందులు ఎదుర్కొన్నారు.కష్టపడి పండించిన వరి ధాన్యాన్ని అమ్ముకునేందుకు కొనుగోలు కేంద్రానికి తీసుకొచ్చిన రైతులు, ధాన్యాన్ని ఆరబెట్టుకుంటున్న సమయంలో వర్షం కురవడంతో దిక్కుతోచని పరిస్థితిలో పడ్డారు. భారీ వర్షానికి ధాన్యం తడిసి ముద్దవడంతో పాటు, వర్షపు నీటి ప్రవాహంలో కొంత ధాన్యం కొట్టుకుపోయినట్లు రైతులు ఆవేదన వ్యక్తం చేశారు.తడిసిన ధాన్యాన్ని కాపాడుకునేందుకు రైతులు నానా అవస్థలు పడ్డారు. నీటిలో కొట్టుకుపోయిన ధాన్యాన్ని ఏరుకుంటూ, తడిసిన ధాన్యాన్ని మళ్లీ ఒక్కొక్కటిగా కుప్పలుగా చేసుకుంటూ కనిపించారు. నెలల తరబడి కష్టపడి పండించిన పంట కళ్లముందే తడిసిపోవడంతో రైతన్నలు కన్నీరు పెట్టుకున్నారు.ఇప్పటికైనా అధికారులు స్పందించి కొనుగోలు కేంద్రాల్లో ధాన్యాన్ని త్వరితగతిన కొనుగోలు చేయాలని, వర్షాల నుంచి ధాన్యాన్ని కాపాడేందుకు తగిన ఏర్పాట్లు చేయాలని రైతులు కోరుతున్నారు. నష్టపోయిన రైతులను ప్రభుత్వం ఆదుకోవాలని విజ్ఞప్తి చేస్తున్నారు.