అర్జీల పరిష్కారంలో జాప్యం వద్దు!

ప్రజావాణి ఫిర్యాదులకు ప్రాధాన్యమివ్వాలి
పెండింగ్‌లో పెట్టకుండా సత్వరమే పరిష్కరించాలి
అధికారులకు అదనపు కలెక్టర్‌ కిరణ్మయి ఆదేశం

(రంగారెడ్డి - మేజర్ న్యూస్)  ప్రజా సమస్యల పరిష్కారంలో అధికారులు నిర్లక్ష్యం వహించకుండా, ప్రజావాణిలో అందిన ప్రతి అర్జీకి ప్రాధాన్యతనిస్తూ సత్వరమే పరిష్కరించాలని జిల్లా అదనపు కలెక్టర్‌ కిరణ్మయి అధికారులను ఆదేశించారు. ఫిర్యాదులను పెండింగ్‌లో పెట్టకుండా ఎప్పటికప్పుడు సమీక్షిస్తూ బాధితులకు న్యాయం జరిగేలా చర్యలు తీసుకోవాలని సూచించారు. ప్రజలకు మెరుగైన సేవలు అందించడంలో అధికారులు బాధ్యతాయుతంగా వ్యవహరించాలని స్పష్టం చేశారు.

సోమవారం సమీకృత జిల్లా కార్యాలయాల సముదాయం (ఐడీఓసీ) సమావేశ మందిరంలో నిర్వహించిన ప్రజావాణి కార్యక్రమంలో అదనపు కలెక్టర్లు కిరణ్మయి (లోకల్‌ బాడీస్‌), చంద్రారెడ్డి ప్రజల నుంచి అర్జీలను స్వీకరించారు. ఈ సందర్భంగా జిల్లాలోని వివిధ ప్రాంతాల నుంచి వచ్చిన ప్రజలు తమ సమస్యలను అధికారుల దృష్టికి తీసుకువచ్చారు.

ప్రజావాణికి మొత్తం 116 ఫిర్యాదులు అందగా, వీటిలో రెవెన్యూ శాఖకు సంబంధించి 67, ఇతర శాఖలకు సంబంధించి 49 అర్జీలు ఉన్నాయి. స్వీకరించిన ఫిర్యాదులను సంబంధిత శాఖల అధికారులకు పంపించి, పరిష్కారానికి తగిన చర్యలు తీసుకోవాలని సూచించారు.

ఈ కార్యక్రమంలో జిల్లా రెవెన్యూ అధికారి శారదాదేవి, వివిధ శాఖల జిల్లా అధికారులు, కలెక్టరేట్‌ సూపరింటెండెంట్లు, సంబంధిత అధికారులు పాల్గొన్నారు.