అక్రమ బెల్ట్ షాపులను పూర్తిగా నిర్మూలించాలి

హిమాయత్ నగర్, మేజర్ న్యూస్ :తెలంగాణ రాష్ట్ర ప్రభుత్వం బార్ అండ్ రెస్టారెంట్లపై విధించబోతున్న ప్రివిలేజ్ పన్నుపై పునరాలోచన చేయాలని తెలంగాణ బార్ అండ్ రెస్టారెంట్ అసోసియేషన్ విజ్ఞప్తి చేసింది. ఈ మేరకు శుక్రవారం బార్ అండ్ రెస్టారెంట్ అసోసియేషన్ ఆధ్వర్యంలో నాంపల్లిలోని ఎక్సైజ్ శాఖ కార్యాలయం ఎదుట పర్మిట్ రూమ్ నిబంధనలను కఠినంగా అమలు చేయాలని కోరుతూ ఆందోళన నిర్వహించారు. ఈ సందర్భంగా అసోసియేషన్ అధ్యక్షుడు దామోదర్ గౌడ్ మాట్లాడుతూ.. తెలంగాణ రాష్ట్రంలో అక్రమంగా ఉన్నటువంటి బెల్టు షాపులను పూర్తిగా నిర్మూలించాలని డిమాండ్ చేశారు. రాష్ట్రవ్యాప్తంగా 1150 బార్లు ఉంటే అందులో 80% మధ్యతరగతి కి చెందిన బార్లేనని గుర్తు చేశారు. రాష్ట్ర ప్రభుత్వం నూతనంగా విధించబోయే పన్ను వలన ఒక్కొక్క భారుపై 30 లక్షల రూపాయల ఆర్థిక భారం పడుతుందని ఆవేదన వ్యక్తం చేశారు. బార్లపై విధించే పన్నుపై పునరాలోచన చేయాలని విజ్ఞప్తి చేశారు. లేనియెడల బార్ అండ్ రెస్టారెంట్లను మూసివేసే పరిస్థితి ఏర్పడుతుందని తెలిపారు.  అనంతరం ఎక్సైజ్ శాఖ కార్యాలయంలో వినతి పత్రం అందజేశారు. ఈ కార్యక్రమంలో అసోసియేషన్ గౌరవ సలహాదారులు బాలరాజ్ గౌడ్, ప్రధాన కార్యదర్శి రాజు గౌడ్ తదితరులు పాల్గొన్నారు.