అధిక ధరలకు బియ్యం విక్రయిస్తే కేసులు..

సూర్య - పెద్దపల్లి: ప్రభుత్వం నిర్ణయించిన ధరలకే బియ్యం విక్రయించాలని, అధిక ధరలకు విక్రయించే వ్యాపారులపై కేసులు నమోదు చేస్తామని జిల్లా పౌరసరఫరాల శాఖ అధికారి కె. శ్రీనాథ్ హెచ్చరించారు. శుక్రవారం 8వ ఇన్‌క్లైన్ కాలనీలోని రైస్ డిపోలు, కిరాణా దుకాణాలు, సూపర్ మార్కెట్లలో అధికారులు తనిఖీలు నిర్వహించారు. ఈ సందర్భంగా అధిక ధరలకు బియ్యం విక్రయిస్తున్న న్యూ గాయత్రి రైస్ డిపోతో పాటు లక్ష్మి కిరాణం, శివకుమార్ జనరల్ స్టోర్, న్యూ సంఘమిత్ర సూపర్ మార్కెట్, ఇండియా స్టోర్‌లపై కేసులు నమోదు చేశారు. ప్రభుత్వం నిర్ణయించిన ధరల ప్రకారం బీపీటీ, కేఎన్ఎం రకం బియ్యం కిలో రూ.66, ఆర్ఎన్ఆర్, తెలంగాణ సోనా రూ.74, హెచ్ఎంటీ, జేఎస్ఆర్ రకం బియ్యం రూ.79కు విక్రయించాలని సూచించారు. నిర్ణీత ధరలను దుకాణాల్లో వినియోగదారులకు కనిపించేలా ప్రదర్శించాలని, కృత్రిమ కొరత సృష్టించినా, అధిక ధరలకు విక్రయించినా కఠిన చర్యలు తీసుకుంటామని హెచ్చరించారు.