ఆకస్మిక గాలి వానలు, ఎల్‌నినో ప్రభావంతో రైతులకు నష్టం కలగకుండా ముందస్తు చర్యలు చేపట్టాలి – ఎమ్మెల్యే BLR వ్యవసాయ, విద్యుత్ శాఖ అధికారులతో సమీక్ష సమావేశం నిర్వహించిన ఎమ్మెల్యే బత్తుల లక్ష్మారెడ్డి
ఆకస్మిక గాలి వానలు, ఎల్‌నినో ప్రభావంతో రైతులకు నష్టం కలగకుండా ముందస్తు చర్యలు చేపట్టాలి – ఎమ్మెల్యే BLR
వ్యవసాయ, విద్యుత్ శాఖ అధికారులతో సమీక్ష సమావేశం నిర్వహించిన ఎమ్మెల్యే బత్తుల లక్ష్మారెడ్డి
మిర్యాలగూడ అర్బన్, మేజర్ న్యూస్:
మిర్యాలగూడ నియోజకవర్గంలో ప్రస్తుతం కురుస్తున్న ఆకస్మిక వర్షాలు, ఈదురుగాలులతో పాటు రానున్న రోజుల్లో ఎల్‌నినో ప్రభావంతో తలెత్తే వాతావరణ మార్పుల నేపథ్యంలో రైతులకు, ప్రజలకు ఎలాంటి ఇబ్బందులు కలగకుండా ముందస్తు జాగ్రత్త చర్యలు చేపట్టాలని ఎమ్మెల్యే బత్తుల లక్ష్మారెడ్డి (BLR) అధికారులను ఆదేశించారు.
ఈ మేరకు మిర్యాలగూడ ఎమ్మెల్యే క్యాంపు కార్యాలయంలో వ్యవసాయ, విద్యుత్ శాఖ అధికారులతో సమీక్ష సమావేశం నిర్వహించారు. ఈ సందర్భంగా ఈదురుగాలులు, అకాల వర్షాల కారణంగా పంటలకు కలుగుతున్న నష్టాన్ని ఎప్పటికప్పుడు గుర్తించి, క్షేత్రస్థాయిలో పర్యటించి పంట నష్టాన్ని అంచనా వేయాలని అధికారులకు సూచించారు. నష్టపోయిన రైతులకు అవసరమైన సహాయ సహకారాలు అందించేందుకు చర్యలు తీసుకోవాలన్నారు.
అలాగే ఎల్‌నినో ప్రభావంతో రానున్న రోజుల్లో ఏర్పడే వాతావరణ మార్పులు, వ్యవసాయ రంగంపై వాటి ప్రభావాన్ని ముందుగానే అంచనా వేసి రైతులకు తగిన అవగాహన కల్పించాలని సూచించారు.
విద్యుత్ శాఖ అధికారులు గాలివానల సమయంలో విద్యుత్ అంతరాయాలు, ప్రమాదాలు జరగకుండా అప్రమత్తంగా ఉండాలని, దెబ్బతిన్న విద్యుత్ స్తంభాలు, వైర్లు, ట్రాన్స్‌ఫార్మర్లను గుర్తించి తక్షణమే మరమ్మతులు చేపట్టాలని ఆదేశించారు.
ప్రకృతి వైపరీత్యాల సమయంలో అన్ని శాఖల అధికారులు సమన్వయంతో పనిచేస్తూ రైతులకు, ప్రజలకు అందుబాటులో ఉండాలని, ఎలాంటి పరిస్థితులనైనా ఎదుర్కొనేందుకు ముందస్తు ప్రణాళికతో సిద్ధంగా ఉండాలని స్పష్టం చేశారు.
రైతుల సంక్షేమం, ప్రజల భద్రతే ప్రభుత్వ ప్రాధాన్యత అని, ప్రతి అధికారి బాధ్యతాయుతంగా పనిచేస్తూ ప్రజలకు అండగా నిలవాలని ఎమ్మెల్యే BLR సూచించారు.
ఈ సమావేశంలో వ్యవసాయ శాఖ, విద్యుత్ శాఖ అధికారులు, సిబ్బంది తదితరులు పాల్గొన్నారు.
