ముస్లిం వీధి, మెయిన్ బజార్‌లలో సంక్షేమ పథకాల వివరింపు
వైకాపా అభ్యర్థుల గెలుపే లక్ష్యంగా విస్తృత ప్రచారం
పత్తికొండలో ఇంటింటికీ తిరిగిన మాజీ ఎమ్మెల్యే శ్రీదేవమ్మ, నాగరత్నమ్మ
ముస్లిం వీధి, మెయిన్ బజార్‌లలో సంక్షేమ పథకాల వివరింపు
పత్తికొండ, మేజర్ న్యూస్:
పత్తికొండ పట్టణంలో స్థానిక సంస్థల ఎన్నికల ప్రచారం హోరెత్తింది. రానున్న స్థానిక సంస్థల ఎన్నికల్లో వైఎస్సార్ కాంగ్రెస్ పార్టీ అభ్యర్థుల విజయమే లక్ష్యంగా మాజీ ఎమ్మెల్యే కంగాటి శ్రీదేవమ్మ, మాజీ ఎంపీపీ నాగరత్నమ్మ నేతృత్వంలో శుక్రవారం పట్టణంలో విస్తృత ప్రచారం నిర్వహించారు.
ఈ సందర్భంగా నాయకులు పట్టణంలోని ముస్లిం వీధి, కొండగేరి, వడ్డగేరి కట్ట, తేరుబజార్, కల్లుపెంట వీధి, మెయిన్ బజార్, అంబేద్కర్ సర్కిల్ తదితర ప్రాంతాల్లో ఇంటింటికీ తిరిగారు. ప్రజలను నేరుగా కలసి వైఎస్ఆర్ కాంగ్రెస్ పార్టీ ఎంపీటీసీ, జెడ్పీటీసీ అభ్యర్థులకు మద్దతుగా ఓటు వేసి అత్యధిక మెజారిటీతో గెలిపించాలని కోరారు.
వ్యాపారులను కలసి పథకాలపై అవగాహన:
ఇంటింటా ప్రచారం అనంతరం నాయకులు పట్టణంలోని ప్రధాన వ్యాపార కేంద్రమైన మెయిన్ బజార్‌లో ప్రచారాన్ని కొనసాగించారు. స్థానిక వ్యాపారులు, ప్రజలను కలసి గతంలో వైఎస్ఆర్ పార్టీ ప్రభుత్వం అందించిన సంక్షేమ పథకాలను వివరిస్తూ ఓట్లు అభ్యర్థించారు. గ్రామాలు, పట్టణాల సర్వాంగీణ అభివృద్ధికి వైకాపా అభ్యర్థులను ఆదరించాలని విజ్ఞప్తి చేశారు.
ఈ కార్యక్రమంలో పత్తికొండ పట్టణానికి చెందిన వైఎస్ఆర్ కాంగ్రెస్ పార్టీ ముఖ్య నాయకులు, కార్యకర్తలు విశేష సంఖ్యలో పాల్గొని ప్రచారంలో ఉత్సాహంగా పాలుపంచుకున్నారు.
