50 వేల టెలికం కేంద్రాలకు సౌర విద్యుత్‌ 300 మెగావాట్ల సామర్థ్యంతో ఇండస్‌ టవర్స్‌ ఘనత.. లక్ష కేంద్రాలకు విస్తరణ లక్ష్యం
మాదాపూర్,మేజర్ న్యూస్ : టెలికం మౌలిక సదుపాయాల సంస్థ ఇండస్‌ టవర్స్‌ దేశవ్యాప్తంగా 50 వేల టెలికం కేంద్రాలకు సౌర విద్యుత్‌ సదుపాయం కల్పించింది. వీటి మొత్తం ఉత్పత్తి సామర్థ్యం 300 మెగావాట్లుగా ఉంది. ఈ కేంద్రాల ద్వారా ఏటా సుమారు 4.2 లక్షల టన్నుల కర్బన ఉద్గారాలను తగ్గించవచ్చని సంస్థ వెల్లడించింది. ఈ పర్యావరణ ప్రయోజనం దాదాపు రెండు కోట్ల చెట్లు నాటడంతో సమానమని తెలిపింది.సౌర విద్యుత్‌ కేంద్రాల పనితీరు, విద్యుదుత్పత్తిని ఎప్పటికప్పుడు పర్యవేక్షించేందుకు డిజిటల్‌ వ్యవస్థలను ఏర్పాటు చేసింది. ప్రస్తుతం ఉన్న 50 వేల కేంద్రాలను లక్షకు పెంచాలని లక్ష్యంగా పెట్టుకుంది. సౌర విద్యుత్‌ వినియోగంతో డీజిల్‌పై ఆధారపడటాన్ని తగ్గించడంతోపాటు ఇంధన వ్యయాన్ని అదుపు చేయవచ్చని సంస్థ ఎండీ, సీఈఓ ప్రచుర్‌ సాహ్‌ తెలిపారు. భారత్‌లో సాధించిన అనుభవంతో ఆఫ్రికాలోనూ ఇలాంటి సౌర విద్యుత్‌ వ్యవస్థలను విస్తరించేందుకు ప్రణాళికలు రూపొందిస్తున్నట్లు పేర్కొన్నారు.
