వికారాబాద్ జిల్లాలో మైనర్ బాలికలపై అఘాయిత్యం కలకలం.. రాజీ పేరుతో కేసు నీరుగారుస్తున్న ఎస్సై

దోమ మండల కేంద్రంలో ఘటన
వికారాబాద్ జిల్లా ప్రతినిధి, మేజర్ న్యూస్ (సెప్టెంబర్ 22):వికారాబాద్ జిల్లా దోమ పోలీస్ స్టేషన్ పరిధిలో వెలుగుచూసిన మైనర్ బాలికలపై అఘాయిత్యం వ్యవహారం స్థానికంగా తీవ్ర కలకలం రేపుతోంది. ఈ ఘటనకు సంబంధించి బాధితుల నుంచి ఫిర్యాదు వచ్చిన మాట వాస్తవమేనని ఎస్సై వసంత్ జాదవ్ అంగీకరించినప్పటికీ, తొలి దశలో ఆయన వ్యవహరించిన తీరుపై సర్వత్రా విమర్శలు వ్యక్తమవుతున్నాయి.ఇరువర్గాల వారు రాజీ లేఖ రాసి ఇవ్వడం వల్లే తాను వెంటనే కేసు నమోదు చేయలేదంటూ ఎస్సై తెరపైకి తెచ్చిన విచిత్ర వాదన ఇప్పుడు పోలీసు శాఖలో తీవ్ర చర్చనీయాంశంగా మారింది. చట్ట ప్రకారం పోక్సో చట్టం కింద వచ్చే తీవ్రమైన నేరాలను కూడా కాంప్రమైజ్ చేసేందుకు ప్రయత్నించడంపై ప్రజల నుంచి తీవ్ర నిరసనలు వ్యక్తమవుతున్నాయి.ఈ దారుణ ఘటనకు సంబంధించి సమాచారం జిల్లా ఎస్పీ దృష్టికి వెళ్లడం, పరిగి డీఎస్పీ శ్రీనివాస్ ప్రత్యేకంగా ఒత్తిడి తేవడంతో స్థానిక పోలీసు యంత్రాంగంలో ఎట్టకేలకు కదలిక వచ్చింది. ఉన్నతాధికారుల సీరియస్ హెచ్చరికలతో అప్రమత్తమైన పోలీసులు హుటాహుటిన దిద్దుబాటు చర్యలకు ఉపక్రమించారు. ఇందులో భాగంగానే బాధితులను, నిందితులను మళ్లీ పోలీస్ స్టేషన్‌కు హడావుడిగా పిలిపించి ఇప్పుడు కేసు నమోదు చేసేందుకు సన్నాహాలు చేస్తున్నట్లు తెలుస్తోంది. ఈ నెల 15 వ తేదీనే ఈ ఘటన జరిగిందని ప్రాథమికంగా చెబుతున్నప్పటికీ, ఇప్పుడే తమకు కొత్తగా ఫిర్యాదు అందిందంటూ ఎస్సై వసంత్ జాదవ్ పొంతనలేని సమాధానాలతో కాలయాపన చేసే ప్రయత్నం చేయడం గమనార్హం.సమాజంలో బాలికల రక్షణ కోసం కఠినమైన చట్టాలు అమల్లో ఉన్నప్పటికీ, బాధ్యతాయుతమైన స్థానంలో ఉండి ఇలాంటి అఘాయిత్యాలను రాజీ పేరుతో నీరుగార్చాలని చూసిన ఎస్సై వసంత్ జాదవ్‌పై శాఖాపరమైన కఠిన చర్యలు తీసుకోవాలని స్థానికులు, ప్రజా సంఘాలు డిమాండ్ చేస్తున్నాయి. అయితే ఈ సున్నితమైన కేసు పూర్తి వివరాలను అధికారికంగా వెల్లడించేందుకు మాత్రం పోలీసులు ఇప్పటికీ తీవ్ర విముఖత వ్యక్తం చేస్తుండటం అనేక అనుమానాలకు తావిస్తోంది. ఉన్నతాధికారులు ఈ ఉదాసీన వైఖరిపై సమగ్ర విచారణ జరిపించి, బాధితులకు నిజమైన న్యాయం జరిగేలా చూడాలని జిల్లా ప్రజలు కోరుతున్నారు.