డ్రైనేజీ ఆక్రమణల తొలగింపునకు మున్సిపల్ చర్యలు

డ్రైనేజీ ఆక్రమణల తొలగింపునకు మున్సిపల్ చర్యలు

ప్రొద్దుటూరు, మేజర్ న్యూస్:  పట్టణంలో వర్షపు నీటి ప్రవాహానికి అడ్డంకిగా మారుతున్న డ్రైనేజీ ఆక్రమణలు, అక్రమ కట్టడాలు, బంకులపై చర్యలకు మున్సిపల్ అధికారులు సిద్ధమయ్యారు. మున్సిపల్ కమిషనర్ తూతిక శ్రీనివాస విశ్వనాథ్ మంగళవారం తెల్లవారుజామున 4 గంటల నుంచే సిబ్బందితో కలిసి పలు ప్రాంతాల్లో క్షేత్రస్థాయి పరిశీలన చేపట్టారు. డ్రైన్లలో ఆక్రమణలతో పాటు ప్లాస్టిక్, చెత్త పేరుకుపోవడంతో నీటి ప్రవాహానికి అంతరాయం ఏర్పడుతున్నట్లు గుర్తించారు. సిల్ట్, చెత్తను వెంటనే తొలగించాలని పారిశుధ్య సిబ్బందిని ఆదేశించారు. ప్రధాన డ్రైన్లపై ఉన్న ఆక్రమణలు, అక్రమ కట్టడాలు, బంకులను గుర్తించి దశలవారీగా తొలగించేందుకు కార్యాచరణ ప్రణాళిక రూపొందించాలని టౌన్ ప్లానింగ్ అధికారులను ఆదేశించారు. ఆక్రమణలను స్వచ్ఛందంగా తొలగించుకోవాలని, లేనిపక్షంలో మున్సిపల్ నిబంధనల ప్రకారం చర్యలు తీసుకుంటామని కమిషనర్ హెచ్చరించారు. డ్రైన్లలో చెత్త, ప్లాస్టిక్ వేయకుండా ప్రజలు సహకరించాలని కోరారు.