కేంద్ర ప్రభుత్వ విధానాలతో ప్రభుత్వ రంగానికి తీరని నష్టం

ఏఐటీయూసీ రాష్ట్ర అధ్యక్షుడు రావులపల్లి రవీంద్రనాథ్‌ ధ్వజం

గాజువాక, సెప్టెంబర్ 22, మేజర్ న్యూస్ : కేంద్ర ప్రభుత్వ కార్మిక వ్యతిరేక విధానాల వల్ల ప్రభుత్వ రంగ సంస్థలు తీవ్రంగా నష్టపోతున్నాయని ఏఐటీయూసీ రాష్ట్ర అధ్యక్షుడు రావులపల్లి రవీంద్రనాథ్‌ విమర్శించారు. విశాఖ స్టీల్‌ వర్కర్స్‌ యూనియన్‌ (ఏఐటీయూసీ) సర్వసభ్య సమావేశం ఉక్కునగరంలోని ఆంధ్రకేసరి కళాక్షేత్రం (సీడబ్ల్యూసీ-2)లో మంగళవారం జరిగింది. తొలుత ఆయన యూనియన్‌ పతాకాన్ని ఆవిష్కరించి కార్యక్రమాన్ని ప్రారంభించారు. ఈ సందర్భంగా రవీంద్రనాథ్‌ మాట్లాడుతూ.. కేంద్రంలోని భాజపా ప్రభుత్వం ప్రభుత్వ రంగ పరిశ్రమలను ఉద్దేశపూర్వకంగా నిర్వీర్యం చేస్తూ, ప్రైవేటీకరణ వైపు నెడుతోందని మండిపడ్డారు. కార్మికులు ఎన్నో పోరాటాలు చేసి సాధించుకున్న హక్కులను పరిమితం చేస్తూ, 44 కార్మిక చట్టాలను రద్దు చేసి 4 లేబర్‌ కోడ్‌లుగా మార్చడం దుర్మార్గమని ఆక్షేపించారు. ​యూనియన్ రాష్ట్ర ప్రధాన కార్యదర్శి ఎస్‌.వెంకటసుబ్బయ్య మాట్లాడుతూ.. ప్రభుత్వ రంగ పరిశ్రమలను కాపాడుకోవడంతో పాటు ఉద్యోగ భద్రత, కార్మిక హక్కుల సాధన కోసం కార్మిక వర్గమంతా విభేదాలు వీడి ఐక్యంగా ఉద్యమించాలని పిలుపునిచ్చారు. ​జే.రామకృష్ణ అధ్యక్షతన జరిగిన ఈ సమావేశంలో ఏఐటీయూసీ జాతీయ ఉపాధ్యక్షుడు డి.ఆదినారాయణ, విశాఖ జిల్లా అధ్యక్షుడు, ప్రధాన కార్యదర్శులు జీఎస్‌జే అచ్యుతరావు, కసిరెడ్డి సత్యనారాయణ, నాయకులు బి.వెంకటరావు, ఎం.ఎ.మాధవరావు, పడాల రమణ, డొక్కా నర్సింగరావు, ఏ.మసేన్‌రావు, ఎన్‌.మిశ్రా, జి.బోసుబాబు, చీకటి అప్పారావు, నందికి తాతారావు తదితరులు పాల్గొన్నారు.