వరి పంటకు సస్యరక్షణే కీలకం
వరి పంటకు సస్యరక్షణే కీలకం
కాండం తొలుచు పురుగు, అగ్గి తెగులుపై రైతులకు అవగాహన
వరి పంటలో ప్రస్తుత దశలో సస్యరక్షణ చర్యలు చేపట్టాలని వ్యవసాయ శాస్త్రవేత్తలు సూచించారు. గురువారం నోముల గ్రామంలో ఆత్మ, వ్యవసాయ శాఖ ఆధ్వర్యంలో నిర్వహించిన రైతు క్షేత్ర పాఠశాల (పొలం బడి) కార్యక్రమంలో రైతులకు అవగాహన కల్పించారు. వరి పంటకు కాండం తొలుచు పురుగు ఆశించే అవకాశం ఉందని, దీని ప్రభావంతో తెల్లకంకులు ఏర్పడతాయని శాస్త్రవేత్తలు తెలిపారు. నివారణకు సిఫార్సు చేసిన మందులను సూచించిన మోతాదులో వినియోగించాలని సూచించారు. అలాగే అగ్గి తెగులు సోకకుండా ట్రైసైక్లోజోల్, ఐసోప్రోథియోలేన్ లేదా కాసుగామైసిన్ మందులను పిచికారీ చేయాలని తెలిపారు. నత్రజని ఎరువులను మోతాదుకు మించి వాడొద్దని, పొలంలో నీరు లేకుండా పూర్తిగా ఆరబెట్టవద్దని సూచించారు. ఈ కార్యక్రమంలో రాజేంద్రనగర్ వ్యవసాయ పరిశోధన సంస్థ శాస్త్రవేత్తలు డాక్టర్ శ్రీధర్, స్రవంతి, మండల వ్యవసాయ అధికారి జి. వెంకటేష్, సర్పంచ్ బత్తుల శృతి, ఉపసర్పంచ్ దుర్గ ప్రసాద్, ఏఈఓలు సాయి సిరి, నికిత, లింగస్వామి, రైతులు పాల్గొన్నారు.
ఎర్ర లింగం, సూర్య మేజర్ న్యూస్, మంచాల
