ఇబ్రహీంపట్నం డిపోలో ఎర్రజెండా ఎగరవేస్తాం

సూర్య మేజర్ న్యూస్, మంచాల :రేపు జరగనున్న టీజీఎస్‌ఆర్టీసీ గుర్తింపు కార్మిక సంఘం ఎన్నికల్లో ఏఐటీయూసీ అనుబంధ ఎంప్లాయీస్‌ యూనియన్‌ను గెలిపించేందుకు ఇబ్రహీంపట్నం డిపో కార్మికులు సిద్ధంగా ఉన్నారని జేఏసీ నాయకులు తెలిపారు. ఎంప్లాయీస్‌ యూనియన్‌ రాష్ట్ర కార్యదర్శి ఈదురు వెంకన్న నాయకత్వంలో కార్మికుల సమస్యలపై పోరాటాలు నిర్వహించి, పీఆర్‌సీతో పాటు పలు డిమాండ్ల సాధనకు కృషి చేశామని వారు పేర్కొన్నారు. గతంలో ఆర్టీసీ యూనియన్ల రద్దు సమయంలో కార్మికుల సమస్యలపై ప్రస్తుత పోటీలో ఉన్న నాయకుల పాత్రను ప్రశ్నించారు. కార్మికుల హక్కుల కోసం జేఏసీగా ఏర్పడి పోరాటాలు చేసిన ఎంప్లాయీస్‌ యూనియన్‌కు ఈ ఎన్నికల్లో మద్దతు ఇవ్వాలని కోరారు. రాష్ట్ర స్థాయిలో బస్సు గుర్తుకు, స్థానిక స్థాయిలో నిచ్చెన గుర్తుకు ఓటు వేయాలని ఇబ్రహీంపట్నం జేఏసీ నాయకులు యాదగిరి, అశోక్‌, డిపో అధ్యక్షుడు జంగయ్య, కార్యదర్శి పరమేష్‌ పిలుపునిచ్చారు. ఈ కార్యక్రమంలో డిపో నాయకులు కిషన్‌, రమేష్‌, కృష్ణ తదితరులు పాల్గొన్నారు.

ఎర్ర లింగం, సూర్య మేజర్ న్యూస్, మంచాల