టీబీ నిర్మూలనకు... జోష్ టీమ్ శ్రీకారం

-యువత, విద్యార్థులతో ప్రజల్లో అవగాహన కల్పించాలి

రంగారెడ్డి జిల్లాలో టీబీ ముక్త్ భారత్ అభియాన్‌లో భాగంగా టీబీ నిర్మూలన లక్ష్యంతో జోష్ టీమ్ (JOSH – Join Our Support to End TB) కార్యక్రమానికి శ్రీకారం చుట్టారు. జిల్లా అదనపు కలెక్టర్ డాక్టర్ కిరణ్మయి అధ్యక్షతన జిల్లా వైద్య ఆరోగ్య శాఖాధికారి డాక్టర్ కళ్యాణ్ చక్రవర్తి ఈ కార్యక్రమాన్ని ఘనంగా ప్రారంభించారు.

ఈ సందర్భంగా డీఎంహెచ్‌ఓ డాక్టర్ కళ్యాణ్ చక్రవర్తి మాట్లాడుతూ, దేశంలో టీబీ నిర్మూలన లక్ష్య సాధనలో జోష్ టీమ్ కీలక పాత్ర పోషిస్తుందని తెలిపారు. యువత, విద్యార్థులు టీబీపై ప్రజల్లో విస్తృతంగా అవగాహన కల్పించాలని సూచించారు. వ్యాధి లక్షణాలు ఉన్న అనుమానితులను గుర్తించి, సమీప ఆరోగ్య కేంద్రాలకు తీసుకెళ్లేలా చొరవ చూపాలని పిలుపునిచ్చారు. టీబీ నివారణ, ముందస్తు గుర్తింపు, సకాలంలో చికిత్సపై ప్రజలకు అవగాహన కల్పించడం ద్వారా వ్యాధి వ్యాప్తిని అరికట్టవచ్చని పేర్కొన్నారు.

ఈ కార్యక్రమంలో డీపీఓ, డీఈఓ, టీబీ అధికారులు, వైద్య అధికారులు, వైద్య సిబ్బంది, జోష్ టీమ్ సభ్యులు పాల్గొన్నారు.

రంగారెడ్డి, మేజర్ న్యూస్ (అక్టోబర్ 08):