చోడవరం ఆది ఆంధ్ర పాఠశాలలో ప్రమాదకర పరిస్థితులు!

ఆరు నెలలుగా విద్యార్థులపై వీధి కుక్కల దాడులు?
అసంపూర్తి ప్రహరీతో పాముల సంచారం.. విద్యార్థుల భద్రత గాలికి!
ప్రధానోపాధ్యాయుల నిర్లక్ష్యంపై చర్యలు తీసుకోవాలని డిమాండ్

చోడవరం, మేజర్ న్యూస్ : చోడవరం చిన్నబజార్‌లోని మండల పరిషత్ ఆది ఆంధ్ర ప్రాథమిక పాఠశాలలో విద్యార్థుల భద్రత ప్రశ్నార్థకంగా మారిందనే ఆరోపణలు వ్యక్తమవుతున్నాయి. పాఠశాల ఆవరణలో ప్రహరీ గోడ అసంపూర్తిగా ఉండటం, మరోవైపు వీధి కుక్కలు, పాముల సంచారం కారణంగా విద్యార్థులు భయాందోళనకు గురవుతున్నారని స్థానికులు ఆవేదన వ్యక్తం చేస్తున్నారు.గత ఆరు నెలలుగా పాఠశాల పరిసరాల్లో వీధి కుక్కలు విద్యార్థులపై దాడి చేస్తున్నాయని, ఇటీవల ఓ బాలికను కుక్క కరిచినట్లు ఆరోపణలు ఉన్నాయి. అయినప్పటికీ సమస్య పరిష్కారానికి అవసరమైన చర్యలు తీసుకోవడంలో పాఠశాల యాజమాన్యం నిర్లక్ష్యంగా వ్యవహరిస్తోందని విమర్శలు వెల్లువెత్తుతున్నాయి. పాఠశాల ప్రాంగణానికి తూర్పు వైపు ప్రహరీ గోడ పూర్తిస్థాయిలో లేకపోవడం వల్ల కుక్కలు లోపలికి ప్రవేశిస్తున్నాయని చెబుతున్నారు. విద్యార్థులు ఆటలాడుకునే ప్రదేశంలో పాములు సంచరిస్తున్నాయనే ఆందోళన కూడా వ్యక్తమవుతోంది. పాఠశాలకు వెళ్లే దారిలో అపరిశుభ్రత నెలకొనడంతో చిన్నారులు ఇబ్బందులు ఎదుర్కొంటున్నారని తల్లిదండ్రులు పేర్కొంటున్నారు. 2025లో బాధ్యతలు చేపట్టిన ప్రధానోపాధ్యాయులు సమస్యను సంబంధిత అధికారుల దృష్టికి తీసుకెళ్లడంలో విఫలమయ్యారనే ఆరోపణలు ఉన్నాయి. విద్యార్థులను కుక్కలు కరిచిన ఘటనలపై మున్సిపల్ అధికారులకు సమాచారం ఇచ్చారా లేదా అన్న అంశంపై స్పష్టత లేదని తెలుస్తోంది. ఈ విషయంపై మండల విద్యాశాఖ అధికారి (ఎంఈఓ)ను సంప్రదించగా, తొలుత పాఠశాలలో కుక్కల దాడుల గురించి తమకు సమాచారం లేదని చెప్పినట్లు ఫిర్యాదుదారులు తెలిపారు. అనంతరం ఫోన్‌లో వివరాలు తెలుసుకున్న తర్వాత ఇటీవల ఓ బాలికను కుక్క కరిచిన ఘటన జరిగినట్లు వెల్లడించారని పేర్కొన్నారు.

అధికారులు స్పందించాలి : విద్యార్థుల భద్రతకు సంబంధించిన ఇంతటి కీలక సమస్యపై పాఠశాల యాజమాన్యం, విద్యాశాఖ అధికారులు తక్షణమే స్పందించాలని స్థానికులు కోరుతున్నారు. అసంపూర్తి ప్రహరీ గోడను పూర్తిచేయడంతో పాటు పాఠశాల పరిసరాలను శుభ్రపరచి, వీధి కుక్కలు, పాముల నుంచి చిన్నారులకు రక్షణ కల్పించాలని డిమాండ్ చేస్తున్నారు. నిర్లక్ష్యం నిర్ధారణ అయితే బాధ్యులపై తగిన చర్యలు తీసుకోవాలని కోరుతున్నారు.