తహసీల్దార్‌ సంతకం ఫోర్జరీ.. రూ.50 కోట్ల భూమికి అక్రమ పట్టా!
రంగారెడ్డి: ఇబ్రహీంపట్నం మండలం మంగళ్‌పల్లిలో ప్రభుత్వ భూమికి ప్రైవేటు వ్యక్తి పేరుతో పట్టా జారీ అయిన వ్యవహారం కలకలం రేపుతోంది. సుమారు 4.25 ఎకరాల ప్రభుత్వ భూమికి వహీదా బేగం పేరుతో పట్టా పాసుపుస్తకం జారీ అయినట్లు అధికారులు గుర్తించారు.
పట్టా జారీ పత్రాల్లో ఇబ్రహీంపట్నం తహసీల్దార్‌ సంతకం ఫోర్జరీ చేసినట్లు ప్రాథమికంగా గుర్తించినట్లు సమాచారం. ఈ భూమి మార్కెట్‌ విలువ సుమారు రూ.50 కోట్ల వరకు ఉంటుందని అంచనా వేస్తున్నారు.
భూ రికార్డుల్లో మార్పులు ఎలా జరిగాయి?
ప్రభుత్వ భూమి ప్రైవేటు వ్యక్తి పేరుతోకి ఎలా మారింది? భూ రికార్డుల్లో మార్పులు ఎలా చోటుచేసుకున్నాయి? పట్టా పాసుపుస్తకం ఏ ప్రాతిపదికన జారీ చేశారు? అనే అంశాలపై అనుమానాలు వ్యక్తమవుతున్నాయి.
భూమి స్వభావం, పాత రెవెన్యూ రికార్డులు, ప్రస్తుత రికార్డుల్లో జరిగిన మార్పులపై అధికారులు పరిశీలన చేపట్టారు. తహసీల్దార్‌ సంతకం ఫోర్జరీ చేసి పట్టా జారీ చేసిన అంశంపైనా దర్యాప్తు కొనసాగుతోంది.
పట్టా రద్దుకు ఉన్నతాధికారులకు ఫిర్యాదు
ప్రభుత్వ భూమికి జారీ అయిన పట్టాను రద్దు చేయడంతో పాటు, ఈ వ్యవహారంలో బాధ్యులెవరో గుర్తించి చర్యలు తీసుకోవాలని కోరుతూ ఉన్నతాధికారులకు ఫిర్యాదు చేసినట్లు తెలుస్తోంది. కోట్లాది రూపాయల విలువైన ప్రభుత్వ భూమి ప్రైవేటు వ్యక్తి పేరుతోకి వెళ్లిన వ్యవహారం కావడంతో రెవెన్యూ వర్గాల్లో చర్చనీయాంశంగా మారింది.
