రబిలో ఆరుతడి పంటలే మేలు!
వరికి బదులు స్వల్పకాలిక పంటలు సాగు చేయాలి యాసంగి సీజన్‌లో ఎల్‌నినో ప్రభావంతో వర్షాభావ పరిస్థితులు ఏర్పడే అవకాశం ఉన్నందున రైతులు వరికి బదులుగా స్వల్పకాలిక ఆరుతడి పంటలు సాగు చేయాలని వ్యవసాయ శాఖ అధికారులు సూచించారు. మండలంలోని మంచాల, బోడకొండ, ఆరుట్ల రైతు వేదికల్లో రైతులకు వీడియో కాన్ఫరెన్స్‌ ద్వారా అవగాహన కల్పించారు. ప్రభుత్వ ముఖ్య కార్యదర్శి సంజయ్‌ జాజు, వ్యవసాయ విశ్వవిద్యాలయ ప్రధాన శాస్త్రవేత్తలు, వాతావరణ శాఖ అధికారులు మాట్లాడుతూ.. బోరుబావుల కింద వరి సాగు చేసే రైతులు నీటి లభ్యతను దృష్టిలో ఉంచుకొని తక్కువ పంటకాలం ఉండే ఆరుతడి పంటలు, కూరగాయలు సాగు చేయాలని సూచించారు. ప్రస్తుతం అక్కడక్కడ పంటలు ఎండిపోతున్నాయని, బోర్లలో నీరు పుష్కలంగా ఉందని దీర్ఘకాలిక పంటలు సాగు చేస్తే ఫిబ్రవరి, మార్చి నెలల్లో ఎల్‌నినో ప్రభావంతో బోర్లు ఎండిపోయి రైతులు నష్టపోయే ప్రమాదం ఉందని హెచ్చరించారు. పెసర, మినుము, అలసంద, కొర్ర, సజ్జ, నువ్వులతో పాటు కూరగాయలు సాగు చేస్తే 70 నుంచి 80 రోజుల్లో పంట చేతికి వస్తుందని తెలిపారు. తద్వారా నీటి వినియోగం తగ్గడంతో పాటు వర్షాభావ పరిస్థితుల వల్ల నష్టాలను కొంతవరకు నివారించవచ్చన్నారు. రైతులకు అవసరమైన విత్తనాలను త్వరలోనే అన్ని మండల కేంద్రాల్లో అందుబాటులో ఉంచుతామని వెల్లడించారు. ఈ వీడియో కాన్ఫరెన్స్‌లలో ప్రాథమిక వ్యవసాయ సహకార సంఘం చైర్మన్‌ వెదిరే హనుమంత్‌రెడ్డి, మండల వ్యవసాయ అధికారి వెంకటేష్‌, బోడకొండ సర్పంచ్‌ జయచందర్‌, ఉప సర్పంచ్‌ రవి, ఆరుట్ల సర్పంచ్‌ శోభ, ఉప సర్పంచ్‌ రాజు, విద్యుత్‌, సాగునీటి, పంచాయతీరాజ్‌ శాఖల అధికారులు, ఏఈవోలు, ఉద్యాన శాఖ అధికారులు, పంచాయతీ కార్యదర్శులు, మహిళా సంఘాల సీసీలు, రైతులు పాల్గొన్నారు.
