అర్ధరాత్రి గర్భిణికి రక్తదానం చేసిన శ్రీకాంత్..రాష్ట్రానికే ఆదర్శంగా రక్తదాతల సేవా సమితి

సూర్య, కామారెడ్డి: అత్యవసర సమయంలో రక్తం అందిస్తూ ప్రాణాలు కాపాడుతున్న జిల్లా రక్తదాతల సేవా సమితి సేవలు అభినందనీయమని పలువురు పేర్కొన్నారు. కామారెడ్డి ప్రభుత్వ ఆసుపత్రిలో చికిత్స పొందుతున్న ప్రీతి అనే గర్భిణికి ఆపరేషన్ నిమిత్తం అత్యవసరంగా బి నెగెటివ్ రక్తం అవసరమైంది. దీంతో కుటుంబ సభ్యులు జిల్లా రక్తదాతల సేవా సమితి నిర్వాహకులను సంప్రదించారు.వెంటనే స్పందించిన సమితి నిర్వాహకులు రక్తదాత కోసం ప్రయత్నించగా, కామారెడ్డి జిల్లా కేంద్రానికి చెందిన శ్రీకాంత్ అర్ధరాత్రి 1 గంట సమయంలో ఆసుపత్రికి చేరుకుని బి నెగెటివ్ రక్తాన్ని దానం చేశారు. ఈ సందర్భంగా సమితి నిర్వాహకులు బోనగిరి శివకుమార్, ముదాం శ్రీధర్ పటేల్ శ్రీకాంత్‌కు కృతజ్ఞతలు తెలిపారు.రక్తం అవసరమైన వారికి ఒక్క ఫోన్ లేదా మెసేజ్ ద్వారా సమాచారం అందిస్తే సాధ్యమైనంత త్వరగా రక్తదాతలను సమకూర్చేందుకు కృషి చేస్తున్నామని తెలిపారు. 18 సంవత్సరాలు నిండిన ప్రతి ఒక్కరూ స్వచ్ఛందంగా రక్తదానం చేసేందుకు ముందుకు రావాలని వారు కోరారు. కార్యక్రమంలో బ్లడ్ సెంటర్ ప్రతినిధులు పాల్గొన్నారు.