ఎస్పీని మర్యాదపూర్వకంగా కలిసిన కళ్యాణదుర్గం నూతన డీఎస్పీ దైవ ప్రసాద్

అనంతపురం బ్యూరో : కళ్యాణదుర్గం నూతన డీఎస్పీగా బాధ్యతలు స్వీకరించిన టి. దైవ ప్రసాద్ జిల్లా ఎస్పీ పి. జగదీష్ ను మంగళవారం మర్యాదపూర్వకంగా కలిశారు. జిల్లా పోలీసు కార్యాలయంలోని ఎస్పీ ఛాంబర్‌లో ఆయనను కలిసి పుష్పగుచ్ఛం అందించారు.

ఈ సందర్భంగా కళ్యాణదుర్గం సబ్‌డివిజన్ పరిధిలో శాంతిభద్రతల పరిరక్షణకు తీసుకోవాల్సిన చర్యలపై ఎస్పీ జగదీష్ డీఎస్పీ దైవ ప్రసాద్‌కు దిశానిర్దేశం చేశారు. నేరాల నియంత్రణకు ప్రత్యేక దృష్టి సారించడంతో పాటు ప్రజలకు పోలీసు సేవలను మరింత చేరువ చేయాలని సూచించారు.

అదేవిధంగా ప్రజల నుంచి వచ్చే ఫిర్యాదులపై తక్షణమే స్పందించి, సమస్యలను పరిష్కరించేలా చర్యలు తీసుకోవాలని ఎస్పీ సూచించారు. ప్రజలకు మెరుగైన పోలీసు సేవలు అందిస్తూ శాంతిభద్రతలను సమర్థవంతంగా పరిరక్షించాలని దైవ ప్రసాద్‌కు తెలిపారు.