హత్యాయత్నం కేసులో పరారీలో ఉన్న ప్రధాన నిందితుడి అరెస్ట్

సూర్య, కోరుట్ల అర్బన్ :కోరుట్ల పట్టణంలోని గాంధీ రోడ్‌లో జరిగిన హత్యాయత్నం, నేరపూరిత కుట్ర కేసులో పరారీలో ఉన్న ప్రధాన నిందితుడు ఠాకూర్ వినయ్ సింగ్ (31)ను కోరుట్ల పోలీసులు అరెస్ట్ చేసినట్లు సిఐ లక్ష్మీనారాయణ వెల్లడించారు. ఆయన తెలిపిన వివరాల ప్రకారం..2024 జూన్ 24న పాత కక్షల నేపథ్యంలో పొగుల రాజేష్‌పై నిందితులు పథకం ప్రకారం దాడి చేసి హత్యకు యత్నించినట్లు ఆయన తెలిపారు. ఈ కేసులో ఇప్పటికే A-2 నుంచి A-6 వరకు నిందితులను అరెస్ట్ చేసి కోర్టులో హాజరుపరిచారు.కాగా, అప్పటి నుంచి పరారీలో ఉన్న A-1 ఠాకూర్ వినయ్ సింగ్‌ను సీఐ లక్ష్మీ నారాయణకు అందిన విశ్వసనీయ సమాచారం మేరకు ఎస్ ఐ శ్యామ్ రాజ్ తన సిబ్బందితో కలిసి మంగళవారం కోరుట్ల బస్‌స్టాండ్ వద్ద అదుపులోకి తీసుకున్నారు. అనంతరం చట్టపరమైన ప్రక్రియలు పూర్తి చేసి వైద్య పరీక్షలు నిర్వహించి కోర్టులో హాజరుపరచగా, 14 రోజుల జ్యుడీషియల్ రిమాండ్ విధించినట్లు ఆయన పేర్కొన్నారు. నేరాలకు పాల్పడి ఎంతకాలం పరారీలో ఉన్నా చట్టం నుంచి తప్పించుకోలేరని, నేర సమాచారం తెలిసిన వెంటనే పోలీసులకు తెలియజేయాలని ప్రజలకు సూచించారు.