పూర్వ విద్యార్థుల సమ్మేళనం-మూడు దశాబ్దాల తర్వాత మిత్రుల కలయిక

సూర్య కాల్వ శ్రీరాంపూర్ మూడు దశాబ్దాల విరామం... మారిన రూపాలు.. మారిన జీవితాలు.. కానీ చెక్కుచెదరని స్నేహబంధం. చిన్ననాటి జ్ఞాపకాలను నెమరువేసుకుంటూ పూర్వ విద్యార్థులు ఒకే వేదికపై కలుసుకోవడంతో కాల్వ శ్రీరాంపూర్‌లో సందడి నెలకొంది.మండల కేంద్రంలోని కేజీఎన్‌ ఫంక్షన్‌ హాల్‌లో స్థానిక జిల్లా పరిషత్‌ ఉన్నత పాఠశాలలో 1994–95లో పదో తరగతి చదివిన పూర్వ విద్యార్థుల సమ్మేళనం ఆదివారం ఘనంగా నిర్వహించారు. సుమారు మూడు దశాబ్దాల తర్వాత ఒకరినొకరు కలుసుకున్న మిత్రులు ఆత్మీయంగా పలకరించుకుని, నాటి పాఠశాల రోజుల మధుర జ్ఞాపకాలను గుర్తు చేసుకున్నారు. తమ జీవిత ప్రయాణంలోని అనుభవాలను పరస్పరం పంచుకుంటూ ఆప్యాయతను చాటుకున్నారు.ఆపదలో ఉన్న మిత్రులకు అండగా ఉండాలని చదువు పూర్తయి ఎవరి జీవితాల్లో వారు స్థిరపడినా, స్నేహబంధాన్ని మాత్రం కొనసాగించాలని పూర్వ విద్యార్థులు నిర్ణయించారు. ఇందులో భాగంగా ఒక ట్రస్ట్‌ను ఏర్పాటు చేసి, ఆపదలో ఉన్న మిత్రులకు ఆర్థికంగా, సామాజికంగా అండగా నిలవాలని నిర్ణయించారు. ఇందుకోసం కమిటీని ఏర్పాటు చేసుకున్నారు.పూర్వ విద్యార్థుల సమ్మేళనాన్ని ముందుండి నిర్వహించి విజయవంతం చేసిన గోలి శ్రీనివాస్‌, కే. రామచంద్రరెడ్డి, ఓడ్నాల జగన్‌, తోట్ల రవి, బైరి కుమార్‌, మధుకర్‌, శ్రీధర్‌, జనార్దన్‌రెడ్డిలను ఈ సందర్భంగా పలువురు అభినందించారు. మూడు దశాబ్దాల తర్వాత జరిగిన ఈ ఆత్మీయ కలయిక పూర్వ విద్యార్థుల్లో నూతన ఉత్సాహాన్ని నింపింది.