మోడల్ సోలార్ విలేజ్ పోటీకి ఐదు గ్రామాలు

అనంతపురం బ్యూరో 

మోడల్ సోలార్ విలేజ్ పోటీకి ఐదు గ్రామాలు

అనంతపురం, సెప్టెంబర్ 28:

 పీఎం సూర్య ఘర్ పథకం కింద నిర్వహించనున్న మోడల్ సోలార్ విలేజ్ కాంపిటీషన్‌కు అనంతపురం జిల్లాలో నార్పల, యాడికి, కంబదూరు, రాప్తాడు, ఉరవకొండ గ్రామాలు ఎంపికయ్యాయి. సోమవారం కలెక్టరేట్‌లో జిల్లా కలెక్టర్ ఓ.ఆనంద్ అధికారులతో సమీక్ష నిర్వహించారు.

మూడు నెలలపాటు జరిగే ఈ పోటీలో అత్యధిక సోలార్ రూఫ్‌టాప్ ఇన్‌స్టాలేషన్లు ఏర్పాటు చేసిన గ్రామానికి కేంద్ర ప్రభుత్వం రూ.1 కోటి ప్రోత్సాహక నిధులు అందిస్తుందని కలెక్టర్ తెలిపారు. ఎంపికైన గ్రామాల ప్రజలు, ప్రజాప్రతినిధులు పెద్ద ఎత్తున సోలార్ సిస్టమ్‌లు ఏర్పాటు చేసుకుని ఈ అవకాశాన్ని సద్వినియోగం చేసుకోవాలని ఆయన కోరారు.

సమావేశంలో ఏపీఎస్పీడీసీఎల్ ఎస్‌ఈ శేషాద్రి శేఖర్, జడ్పీ సీఈవో విజయలక్ష్మి, డీఆర్‌డీఏ పీడీ శైలజ, నెడ్‌క్యాప్ మేనేజర్ కిషోర్ తదితరులు పాల్గొన్నారు.