పొలాలకు వెళ్లే దారి విషయంలో వివాదం.. ఇరువర్గాలపై కేసులు
నవాబుపేట, మేజర్ న్యూస్:మాదిరెడ్డిపల్లి గ్రామంలో ఇంటి వద్ద ఏర్పాటు చేసుకున్న సిమెంట్ రాప్ను తొలగించే విషయంలో ఇరువర్గాల మధ్య ఘర్షణ చోటుచేసుకుంది. పొలాలకు వెళ్లే దారి విషయంలో తలెత్తిన వివాదం చివరకు గొడవకు దారితీసింది. ఈ ఘటనపై ఇరువర్గాలపై కేసులు నమోదు చేసినట్లు నవాబుపేట ఎస్ఐ గిరి తెలిపారు.
ఇంటి వద్ద రాప్ ఏర్పాటు
గ్రామానికి చెందిన దగ్గుల అనంతరాములు తండ్రి లక్ష్మయ్య తన ఇంటి వద్ద బైకులు, కారు ఇంట్లోకి తీసుకెళ్లేందుకు వీలుగా చిన్న సిమెంట్ రాప్ను ఏర్పాటు చేసుకున్నారు. అయితే ఆ రాప్ ఉన్న ప్రదేశం నుంచి పొలాలకు వెళ్లే దారి ఉందని పేర్కొంటూ అదే గ్రామానికి చెందిన కొంతమంది వ్యక్తులు దానిని తొలగించాలని కోరారు.
తొలగించే ప్రయత్నంతో వివాదం
ఈ క్రమంలో చాకలి రామచంద్రి, ఎల్లకొండ నరసింహులు, డిల్లెపు గోపాల్, డిల్లెపు శేఖర్ తదితరులు కలిసి దగ్గుల అనంతరాములు ఇంటి వద్ద ఉన్న సిమెంట్ రాప్ను తొలగించేందుకు ప్రయత్నించినట్లు పోలీసులు తెలిపారు. దీంతో ఇరువర్గాల మధ్య వాగ్వాదం జరిగి ఘర్షణకు దారితీసింది.
ఇరువర్గాలపై కేసులు
సమాచారం అందుకున్న పోలీసులు ఘటనపై విచారణ చేపట్టారు. ఇరువర్గాల ఫిర్యాదుల మేరకు కేసులు నమోదు చేసినట్లు ఎస్ఐ గిరి తెలిపారు. గ్రామంలో ఎలాంటి అవాంఛనీయ ఘటనలు చోటుచేసుకోకుండా పోలీసులు పరిస్థితిని పర్యవేక్షిస్తున్నారు. రిపోర్టర్ ఎం.వెంకటేష్
