ప్రొద్దుటూరులో కుటుంబ కలహాలతో వ్యక్తి ఆత్మహత్య

ప్రొద్దుటూరు, సెప్టెంబర్ 28, మేజర్  న్యూస్:

ప్రొద్దుటూరు టూ టౌన్ పోలీస్ స్టేషన్ పరిధిలో కుటుంబ కలహాల నేపథ్యంలో ఓ వ్యక్తి ఉరి వేసుకొని ఆత్మహత్యకు పాల్పడిన ఘటన సోమవారం చోటుచేసుకుంది. పోలీసులు తెలిపిన వివరాల మేరకు శ్రీనివాస నగర్‌లో బాలాజీ గ్యాస్ ఏజెన్సీ ఎదురుగా నివాసం ఉంటున్న కృష్ణయ్య (40) సోమవారం ఉదయం సుమారు 11:30 గంటల సమయంలో తన ఇంట్లో ఉరి వేసుకొని ఆత్మహత్యకు పాల్పడ్డాడు. మృతుడు హమాలీ పనులు చేసుకుంటూ జీవనం సాగిస్తున్నాడు. అతని తండ్రి పేరు పెంచలయ్య. ప్రాథమిక సమాచారం ప్రకారం కుటుంబ కలహాల కారణంగా కృష్ణయ్య భార్య ఈ నెల 26వ తేదీన ఇంటి నుంచి వెళ్లిపోయినట్లు తెలుస్తోంది. దీంతో తీవ్ర మనస్తాపానికి గురైన కృష్ణయ్య ఇంట్లో ఉరి వేసుకొని ఆత్మహత్యకు పాల్పడినట్లు పోలీసులు ప్రాథమికంగా భావిస్తున్నారు. సమాచారం అందుకున్న టూ టౌన్ పోలీసులు వెంటనే సంఘటనా స్థలానికి చేరుకుని పరిశీలించారు. అనంతరం మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. మృతుడి తల్లి చిన్నక్క ఇచ్చిన ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. ఘటనకు సంబంధించిన పూర్తి వివరాలను దర్యాప్తు అనంతరం వెల్లడిస్తామని ప్రొద్దుటూరు టూ టౌన్ పోలీస్ స్టేషన్ సీఐ వంశీనాధ్ తెలిపారు