చోరీ సొత్తు రికవరీలో ప్రతిభ.. సౌత్ క్రైమ్ పోలీసులకు 4 రివార్డులు
సౌత్ క్రైమ్ బృందానికి సీపీ డాక్టర్ శంఖబ్రత బాగ్చి ప్రశంసలు
గాజువాక, సెప్టెంబర్ 29, మేజర్ న్యూస్ : పోగొట్టుకున్న బంగారు ఆభరణాలను వేగంగా రికవరీ చేసి బాధితులకు అప్పగించడంలో విశేష ప్రతిభ కనబరిచిన సౌత్ సబ్-డివిజన్ క్రైమ్ బ్రాంచ్ పోలీసులకు ఉన్నతాధికారుల నుంచి ప్రశంసలు దక్కాయి. నగర పోలీస్ కమిషనర్ కార్యాలయంలో నిర్వహించిన నేర సమీక్షా సమావేశంలో సీపీ డాక్టర్ శంఖబ్రత బాగ్చి చేతుల మీదుగా సౌత్ క్రైమ్ ఇన్స్పెక్టర్ జీడి బాబు, ఎస్సై హరికృష్ణలు ఈ రివార్డులను అందుకున్నారు. బాధితుల నుంచి ఫిర్యాదు అందిన వెంటనే పోలీసులు వేగంగా దర్యాప్తు చేసి నిందితులను గుర్తించడం, పోయిన బంగారాన్ని రికవరీ చేసి బాధితులకు తిరిగి అప్పగించడాన్ని సీపీ ప్రత్యేకంగా అభినందించారు. క్రైమ్ విభాగం సమష్టి కృషితో పనిచేయడం వల్లే తక్కువ సమయంలో మంచి ఫలితాలు సాధ్యమయ్యాయని పేర్కొన్నారు. బాధితులకు సత్వర న్యాయం అందించడం ద్వారా పోలీసులపై ప్రజల్లో నమ్మకం మరింత పెరుగుతుందని చెప్పారు. మున్ముందు కూడా ఇదే నిబద్ధతతో పనిచేస్తూ నేరాల నియంత్రణకు ముందస్తు చర్యలు తీసుకోవాలని అధికారులకు సూచించారు. ఈ కార్యక్రమంలో డీసీపీ లతా మాధురి తదితరులు పాల్గొన్నారు.
