గుండె సమస్యలపై శ్రద్ధ వహించాలి..!

-- ట్రాఫిక్ ఎస్ఐ పాపారావు 
ఆనందపురం:29సెప్టెంబర్ మేజర్ న్యూస్

ప్రస్తుత రోజుల్లో చిన్న వయసులోనే గుండె జబ్బులకు గురై మరణాలు సంభవిస్తున్నాయని, ప్రతి ఒక్కరూ గుండె ఆరోగ్యంపై ప్రత్యేక శ్రద్ధ వహించాలని ఆనందపురం ట్రాఫిక్ ఎస్ఐ పాపారావు సూచించారు.
ప్రపంచ గుండె దినోత్సవం సందర్భంగా ఉత్తరాంధ్ర సామాజిక గ్రామీణ వైద్యుల సంక్షేమ సంఘం ఆధ్వర్యంలో వేములవలస జోనల్ కార్యాలయం వద్ద మదర్ తెరిసా విగ్రహానికి పూలమాల వేసి ప్రజా అవగాహన ర్యాలీ నిర్వహించారు. ఈ సందర్భంగా ఎస్ఐ పాపారావు మాట్లాడుతూ జంక్‌ఫుడ్‌, ఫాస్ట్‌ఫుడ్‌కు దూరంగా ఉండాలని, మద్యం, గుట్కా వంటి మత్తు పదార్థాలకు దూరంగా ఉంటూ ఆరోగ్య జాగ్రత్తలు పాటించాలని తెలిపారు.
సంఘం వ్యవస్థాపక అధ్యక్షుడు జంగం జోషి మాట్లాడుతూ గుండె జబ్బుల నివారణకు తీసుకోవాల్సిన జాగ్రత్తలపై కరపత్రాల ద్వారా ప్రజలకు అవగాహన కల్పించామని తెలిపారు.
కార్యక్రమంలో జోనల్ సలహాదారు కోన ప్రకాష్, కోశాధికారి పచ్చిపులుసు కనకారావు, ఆనందపురం మండల అధ్యక్ష, కార్యదర్శులు సుధాకర్ రెడ్డి, నాగేశ్వరరావు, విశాఖ జిల్లా ఉపాధ్యక్షుడు పడాల కోటేశ్వరరావు, ప్రచార కార్యదర్శి వినోద్ కుమార్ తదితరులు పాల్గొన్నారు.