వడ్డెరల భూములకు రక్షణ కల్పించండి సారూ..!

కేశవరావు(కేకే) తనయుడిపై భూదౌర్జన్యానికి పాల్పడుతున్నారంటూ రైతుల ఆరోపణలు

వివాదాస్పద భూమిని పరిశీలించిన రెవెన్యూ అధికారులు.. కోర్టు తీర్పు వరకు ఇరువర్గాలు భూమిలోకి వెళ్లొద్దన్న ఎస్‌ఐ

పూడూరు, మేజర్ న్యూస్( సెప్టెంబర్ 28):
పూడూరు మండలం మీర్జాపూర్ గ్రామంలోని భూవివాదం మరోసారి తెరపైకి వచ్చింది. తమ పూర్వీకుల నుంచి సాగు చేసుకుంటున్న భూమిని కొందరు బలవంతంగా స్వాధీనం చేసుకునేందుకు ప్రయత్నిస్తున్నారని వడ్డెర రైతులు ఆరోపించారు. ప్రభుత్వ సలహాదారు కేకే తనయుడు వెంకటేశ్వరరావు తమ భూముల విషయంలో జోక్యం చేసుకుంటున్నారని వడ్డెర అంతయ్య, ఎల్లయ్య, రవి, రామయ్య, వెంకటయ్య, యాదయ్య ఆరోపించారు. తమ భూములకు రక్షణ కల్పించి న్యాయం చేయాలని వారు అధికారులను కోరారు.

*10 ఎకరాలపై వివాదం

మీర్జాపూర్ గ్రామంలోని సర్వే నంబర్‌ 20లో ఉన్న సుమారు 10 ఎకరాల భూమిపై ఇరువర్గాల మధ్య వివాదం కొనసాగుతోంది. ఈ నేపథ్యంలో జిల్లా కలెక్టర్ ఆదేశాల మేరకు సోమవారం రెవెన్యూ అధికారులు వివాదాస్పద భూమిని పరిశీలించారు. ఎంఆర్‌ఐ సుదర్శన్, జీపీఓ మొగులప్ప, అసిస్టెంట్ సర్వేయర్ చంటి ఇరువర్గాలకు సమాచారం ఇచ్చి భూమిని పరిశీలించినట్లు అధికారులు తెలిపారు.

*1973 నుంచి సాగు చేస్తున్నామని రైతుల వెల్లడి

1973-74 నుంచి తమ పూర్వీకులు రక్షిత కౌలుదారులుగా భూమిని సాగు చేసుకుంటూ జీవనం సాగిస్తున్నారని రైతులు తెలిపారు. రాములమ్మ, వెంకట సుబ్బమ్మ భర్త సంగారెడ్డి నుంచి వడ్డెర ఎల్లయ్యకు రక్షిత కౌలుదారుగా భూమి సంక్రమించిందని పేర్కొన్నారు. భూమికి సంబంధించిన పాత పత్రాలు, ఇతర ఆధారాలు తమ వద్ద ఉన్నాయని తెలిపారు.

*తప్పుడు దస్తావేజులు సృష్టించారంటూ ఆరోపణ

2005లో నరసింహరెడ్డి నుంచి గద్వాల విజయలక్ష్మి, కంచర్ల కవిత, వెంకటేశ్వరరావులు భూమిని కొనుగోలు చేసినట్లు దస్తావేజులు సృష్టించి తమ భూమిని స్వాధీనం చేసుకునేందుకు ప్రయత్నిస్తున్నారని రైతులు ఆరోపించారు. ఈ భూవివాదం హైకోర్టు నుంచి జిల్లా కలెక్టర్ కార్యాలయానికి ఫార్వర్డ్ అయినట్లు వారు తెలిపారు. కలెక్టర్ ఆదేశాల మేరకు రెవెన్యూ అధికారులు భూమిని పరిశీలించి వివరాలు సేకరిస్తున్నారు.

*కోర్టు తీర్పు వచ్చే వరకు భూమిలోకి రావొద్దు: ఎస్సై భరత్ రెడ్డి 

వివాదాస్పద భూమిపై న్యాయస్థానం తుది నిర్ణయం వెలువడే వరకు ఇరువర్గాల వారు భూమిలోకి ప్రవేశించకుండా సంయమనం పాటించాలని ఎస్‌ఐ భరత్‌రెడ్డి సూచించినట్లు రైతులు తెలిపారు. పేరు, పలుకుబడి, ఆర్థిక బలం ఉన్నవారి ఒత్తిళ్లకు తలొగ్గకుండా తమ భూములను కాపాడి న్యాయం చేయాలని వడ్డెర రైతులు జిల్లా అధికారులను విజ్ఞప్తి చేశారు.రిపోర్టర్ గణపురం శ్రీరాములు.