పూల సోయగాలతో పల్లెల్లో బతుకమ్మ సందడి!
చిన్నకోడూరు, తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలు చిన్నకోడూరు మండలవ్యాప్తంగా ఘనంగా ప్రారంభమయ్యాయి. రంగురంగుల పూలతో పేర్చిన బతుకమ్మలతో మహిళలు, చిన్నారులు సందడి చేశారు. మండల పరిధిలోని పెద్దకోడూరు గ్రామంలో మహిళలు ఏకరూప దుస్తులు ధరించి, వివిధ రకాల పూలతో అందంగా బతుకమ్మలను పేర్చి వీధుల్లోకి చేరుకున్నారు. బతుకమ్మల చుట్టూ వలయంగా నిలబడి సంప్రదాయ పాటలు పాడుతూ, చప్పట్లు కొడుతూ ఉత్సాహంగా ఆడిపాడారు.పూల పరిమళాలు, మహిళల బతుకమ్మ పాటలు, చిన్నారుల కేరింతలతో గ్రామంలో పండుగ వాతావరణం నెలకొంది. తెలంగాణ ఆడపడుచుల ఆత్మీయతకు, ప్రకృతి ఆరాధనకు ప్రతీకగా నిలిచే బతుకమ్మ వేడుకలను మహిళలు ఆనందోత్సాహాల మధ్య నిర్వహించారు. రంగురంగుల బతుకమ్మలతో గ్రామ వీధులు కళకళలాడాయి.పల్లెల్లో పండుగ శోభను నింపుతూ ప్రారంభమైన బతుకమ్మ వేడుకలు తెలంగాణ గ్రామీణ సంస్కృతి, సంప్రదాయాల వైభవాన్ని మరోసారి చాటిచెప్పాయి.
