పోలీస్ సిబ్బందికి వ్యాసరచన పోటీ

పోలీస్ విధులు, ప్రజాసేవపై అవగాహన పెంపొందించడమే లక్ష్యం

వికారాబాద్ జిల్లా ప్రతినిధి, మేజర్ న్యూస్(అక్టోబర్ 10): పోలీస్ ఫ్లాగ్ డే–2026ను పురస్కరించుకుని వికారాబాద్ జిల్లా పోలీస్ శాఖ ఆధ్వర్యంలో శనివారం జిల్లా పోలీస్ శిక్షణ కేంద్రం (డీటీసీ)లో పోలీస్ సిబ్బందికి వ్యాసరచన పోటీ నిర్వహించారు. జిల్లా ఎస్పీ స్నేహ మెహ్రా, ఐపీఎస్ ఆదేశాల మేరకు ఈ కార్యక్రమాన్ని చేపట్టారు.పోలీస్ సిబ్బందిలో రచనా నైపుణ్యాలు, సృజనాత్మక ఆలోచనలను ప్రోత్సహించడంతో పాటు పోలీస్ విధులు, బాధ్యతలు, ప్రజాసేవ, శాంతిభద్రతల పరిరక్షణలో పోలీసుల పాత్రపై అవగాహన పెంపొందించడమే పోటీ ముఖ్య ఉద్దేశమని అధికారులు తెలిపారు.తెలంగాణ పోలీస్ శాఖ ఆదేశాల మేరకు అక్టోబర్ 21న నిర్వహించనున్న పోలీస్ ఫ్లాగ్ డే సందర్భంగా జిల్లాలో వివిధ కార్యక్రమాలు చేపడుతున్నట్లు పేర్కొన్నారు. ప్రజల ఆకాంక్షలకు అనుగుణంగా సేవలందించడం, ప్రజల గౌరవం, విశ్వాసాన్ని పొందడం, క్షేత్రస్థాయిలో పోలీసింగ్‌ను బలోపేతం చేయడం, సామాజిక మాధ్యమాలను బాధ్యతాయుతంగా వినియోగించడం వంటి అంశాలపై సిబ్బంది తమ ఆలోచనలను వ్యాసాల రూపంలో వ్యక్తం చేసేలా ఈ పోటీ నిర్వహించారు.ఇలాంటి కార్యక్రమాలు పోలీస్ సిబ్బందిలో వృత్తిపరమైన నైపుణ్యాలను పెంపొందించడంతో పాటు ప్రజలకు మరింత సమర్థవంతమైన సేవలు అందించేందుకు దోహదపడతాయని పోలీస్ అధికారులు తెలిపారు.ఈ కార్యక్రమంలో డీటీసీ డీఎస్పీ శ్రీనివాస్, ఏఆర్ డీఎస్పీ వీరేష్, ఆర్‌ఐ శ్రీశైలం, ఇతర పోలీస్ అధికారులు పాల్గొన్నారు.