పంచాయతీల్లో చెక్కుల చెల్లింపులకు మార్గం సుగమం.. ఉప సర్పంచ్‌ల జాప్యంపై చర్యలకు ప్రభుత్వం ఆదేశం
హైదరాబాద్, సూర్య ప్రతినిధి :గ్రామ పంచాయతీల్లో నిధుల వినియోగం, చెక్కుల చెల్లింపు ప్రక్రియలో ఎదురవుతున్న తీవ్ర జాప్యానికి చెక్ పెడుతూ తెలంగాణ ప్రభుత్వం కీలక నిర్ణయం తీసుకుంది. పంచాయతీ రాజ్ శాఖ మంత్రి సీతక్క ఆదేశాల మేరకు జిల్లా పంచాయతీ అధికారులకు (DPO) ఉన్నతాధికారులు స్పష్టమైన ఉత్తర్వులు జారీ చేశారు.
గ్రామాల్లో అభివృద్ధి పనులు, నిత్యవసర ఖర్చుల కోసం బిల్లులు చెల్లించే క్రమంలో సర్పంచ్, ఉప సర్పంచ్‌ల మధ్య నడుస్తున్న విభేదాల కారణంగా చెక్కుల ఆమోదం నిలిచిపోతోందని ప్రభుత్వం దృష్టికి వచ్చింది. సంయుక్త సంతకాల (జాయింట్ చెక్ పవర్) విధానంలో సర్పంచ్ సంతకం చేసినప్పటికీ, రాజకీయ వైరుధ్యాలు లేదా వ్యక్తిగత కక్షలతో ఉప సర్పంచ్‌లు చెక్కులపై సంతకాలు చేయడంలో కావాలని జాప్యం చేస్తున్నట్లు ఫిర్యాదులు వెల్లువెత్తాయి.
దీనిపై స్పందించిన మంత్రి సీతక్క, అభివృద్ధి పనులకు ఎలాంటి ఆటంకం కలగకూడదని ఆదేశించారు. సర్పంచ్ మంజూరు చేసిన బిల్లుల చెక్కులపై ఉప సర్పంచ్‌లు తగిన కారణం లేకుండా సంతకాలు చేయడంలో జాప్యం చేస్తే లేదా నిరాకరిస్తే వారిపై చట్టపరమైన చర్యలు తీసుకోవాలని ఆదేశాల్లో పేర్కొన్నారు. అవసరమైతే అధికారుల పరిశీలన అనంతరం ప్రత్యామ్నాయ చర్యలు చేపట్టేందుకు జిల్లా పంచాయతీ అధికారులకు స్పష్టమైన మార్గదర్శకాలు జారీ చేశారు. ప్రభుత్వ తాజా ఉత్తర్వులతో పంచాయతీల్లో సాగుతున్న 'చెక్ వార్'కు తెరపడనుంది.
