గాంధీజీకి విఘ్నేశ్వర, అధికారులు నివాళులు

వెల్దుర్తి సూర్య మేజర్ న్యూస్ : మహాత్మా గాంధీ జయంతిని పురస్కరించుకుని గురువారం వెల్దుర్తి మండల వ్యాప్తంగా వేడుకలను ఘనంగా నిర్వహించారు. అన్ని ప్రభుత్వ, ప్రైవేటు కార్యాలయాల్లో అధికారులు, సిబ్బంది గాంధీజీ చిత్రపటానికి పూలమాలలు వేసి నివాళులర్పించారు.పట్టణంలోని సంతబజారులో ఆర్యవైశ్య సంఘం ఆధ్వర్యంలో మహాత్మా గాంధీ, పొట్టి శ్రీరాములు విగ్రహాలకు పూలమాలలు వేసి అంజలి ఘటించారు. మండలంలోని పలు పంచాయతీల పరిధిలో ప్రత్యేక గ్రామసభలు నిర్వహించారు.

గ్రామాభివృద్ధే ధ్యేయం:

రామళ్లకోటలో నిర్వహించిన గ్రామసభలో ఎంపీడీఓ చంద్రశేఖర్‌రెడ్డి, ఏఓ అక్బర్‌బాషా, డిప్యూటీ ఎంపీడీఓ రవికిశోర్‌, ఏపీఓ లక్ష్మన్న పాల్గొని మాట్లాడారు. హార్టికల్చర్‌ గ్లోబల్‌ హబ్‌ విశేషాలు, వివిధ ప్రభుత్వ పథకాల అమలుతీరును వివరించారు. ప్రజారక్షణ, ఆరోగ్య అవసరాలపై ప్రజలకు అవగాహన కల్పించారు.వెల్దుర్తి మేజర్‌ పంచాయతీ కార్యాలయంలో జరిగిన సభలో ఎంపీడీఓ మాట్లాడుతూ.. గాంధీజీ కలలుగన్న గ్రామ స్వరాజ్య సాధనకు ప్రతి ఒక్కరూ కృషి చేయాలని పిలుపునిచ్చారు. పరిశుభ్రత, పారిశుద్ధ్యం, తాగునీరు, వీధిలైట్ల నిర్వహణపై ప్రత్యేక దృష్టి సారించాలని, సీజనల్‌ వ్యాధుల పట్ల అప్రమత్తంగా ఉండాలని సచివాలయ సెక్రటరీలు, ఆరోగ్య సిబ్బందికి సూచించారు. ఈ సందర్భంగా పంచాయతీ సిబ్బంది గతేడాది ఆదాయ, వ్యయాలు, మిగులు వివరాలను గ్రామసభకు వివరించారు.

సూర్య ప్రతినిధి షేక్ దస్తగిరి వెల్దుర్తి మండలం కర్నూలు జిల్లా