తెలంగాణలో ప్రజా భద్రతకు డేటా ఆధారిత పోలీసింగ్‌ మరింత బలోపేతం చేయాలి: డా శివ ప్రసాద్
తెలంగాణలో ప్రజా భద్రతకు డేటా ఆధారిత పోలీసింగ్‌ మరింత బలోపేతం చేయాలి: డా శివ ప్రసాద్
హైదరాబాద్: తెలంగాణలో నేరాల నియంత్రణకు పోలీసు శాఖ చేస్తున్న చర్యలను స్వాగతిస్తూనే, మారుతున్న నేర స్వరూపానికి అనుగుణంగా డేటా ఆధారిత, ప్రజాకేంద్రిత పోలీసింగ్‌ను మరింత బలోపేతం చేయాల్సిన అవసరం ఉందని సహస్ర ఫౌండేషన్ చైర్మన్ డా. చినుకని శివ ప్రసాద్ అన్నారు.
2023–24లో 2,65,377గా ఉన్న మొత్తం కేసులు 2025–26లో 2,84,363కు, 7.15% పెరిగాయి. ఇదే కాలంలో మాదకద్రవ్యాల కేసులు 2,026 నుంచి 2,960కు పెరగడం ప్రత్యేక ఆందోళనకర అంశమని తాజా పోలీసు క్రైమ్‌ రివ్యూ గణాంకాలు వెల్లడిస్తున్నాయి. అదే సమయంలో తీవ్రమైన నేరాలు, సైబర్‌ నేరాలు తగ్గినట్లు నివేదిక పేర్కొంది.
డ్రగ్స్‌, సైబర్‌ మోసాలు, మహిళలు–పిల్లల భద్రత, ట్రాఫిక్‌ నేరాలపై ప్రత్యేక కార్యాచరణ, ప్రతి ఫిర్యాదుపై వేగవంతమైన స్పందన, దర్యాప్తు పురోగతిపై పారదర్శక పర్యవేక్షణ, ఆధునిక సాంకేతికత వినియోగాన్ని మరింత పెంచాలని డా. శివ ప్రసాద్ కోరారు.
“పోలీసింగ్‌ అంటే కేవలం నేరం జరిగిన తర్వాత చర్య కాదు; నేరం జరగకుండా ముందస్తు నివారణ, బాధితుడికి సకాలంలో స్పందన, ప్రజల్లో భద్రతాభావం కల్పించడం కూడా అంతే ముఖ్యం. తెలంగాణలో ప్రజా నమ్మకాన్ని మరింత బలోపేతం చేసే పోలీసింగ్‌ అవసరం” అని ఆయన అన్నారు.
