రాష్ట్ర వీఆర్వో సంఘం ఉపాధ్యక్షుడిగా భరణికం వీఆర్వో బొమ్మిరెడ్డిపల్లి శ్రీనివాసరావు ఘన విజయం

పరవాడ, అక్టోబర్ 2 ,మేజర్ న్యూస్:-
ఆంధ్రప్రదేశ్ రాష్ట్ర గ్రామ రెవెన్యూ అధికారుల సంఘం రాష్ట్ర ఉపాధ్యక్షుడిగా (స్టేట్ వైస్ ప్రెసిడెంట్) పరవాడ మండలం భరణికం వీఆర్వో బొమ్మిరెడ్డిపల్లి శ్రీనివాసరావు ఘన విజయం సాధించారు. విజయవాడలోని కేంద్ర కార్యాలయంలో శుక్రవారం హోరాహోరీగా జరిగిన ఎన్నికల్లో ఆయన ఈ పదవికి ఎంపికయ్యారు. ఆంధ్రప్రదేశ్ రాష్ట్ర ఏపీ జేఏసీ అమరావతి చైర్మన్ బొప్పరాజు వెంకటేశ్వర్లు  ఆదేశాల మేరకు ఈ ఎన్నికల ప్రక్రియ జరిగింది. ఎన్నికల అధికారిగా ఏపీఆర్ఎస్ఏ ప్రధాన కార్యదర్శి, డిప్యూటీ కలెక్టర్ కృష్ణమూర్తి వ్యవహరించి ఎన్నికలను పారదర్శకంగా నిర్వహించారు. ఈ నూతన కార్యవర్గం 2026 నుండి 2029 వరకు మూడేళ్ల కాలపరిమితితో బాధ్యతల్లో కొనసాగుతుంది.
బొమ్మిరెడ్డిపల్లి శ్రీనివాసరావుకు ఉద్యోగ సంఘంలో సుదీర్ఘమైన, క్రియాశీలకమైన అనుభవం ఉంది. ఆయన గతంలో 2016 నుండి 2023 వరకు రాష్ట్ర ట్రెజరర్‌గా బాధ్యతలు నిర్వర్తించారు. ఆ తర్వాత 2023 నుండి నేటి వరకు రాష్ట్ర అసోసియేట్ ప్రెసిడెంట్‌గా వీఆర్వో సంఘంలో విశేష సేవలు అందించారు. తాజాగా నేడు జరిగిన ఎన్నికల్లో స్టేట్ వైస్ ప్రెసిడెంట్‌గా పోటీ చేసి గెలుపొందారు.
తన విజయం అనంతరం వీఆర్వో శ్రీనివాసరావు మాట్లాడుతూ తన గెలుపునకు అహర్నిశలు కృషి చేసి, సహకరించిన సహచర ఉద్యోగులందరికీ పేరుపేరునా హృదయపూర్వక ధన్యవాదాలు తెలియజేశారు. ఉద్యోగుల సంక్షేమానికి, హక్కుల సాధనకు తన వంతు నిరంతరం కృషి చేస్తానని హామీ ఇచ్చారు. వీఆర్వోలకు ఎలాంటి ఇబ్బందులు ఎదురైనా, ఆ సమస్యలను తన దృష్టికి తీసుకువస్తే సంఘం రాష్ట్ర అధ్యక్షుడితో కలిసి ముందుండి పరిష్కరిస్తానని భరోసా ఇచ్చారు. ఈ కార్యక్రమంలో రాష్ట్రవ్యాప్తంగా వచ్చిన ప్రభుత్వ అధికారులు, వీఆర్వోలు పెద్ద సంఖ్యలో పాల్గొని నూతన ఉపాధ్యక్షుడికి శుభాకాంక్షలు తెలిపారు.