నూతనకల్‌లో ఘనంగా ఎంగిలిపూల బతుకమ్మ సంబరాలు

రంగురంగుల పూలతో ప్రకృతికి పూజలు

మేడ్చల్ ,మేజర్ న్యూస్(అక్టోబర్ 10): తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సంబరాలు ఎల్లంపేట మున్సిపాలిటీ పరిధిలోని నూతనకల్ గ్రామంలో ఘనంగా ప్రారంభమయ్యాయి. పండుగలో తొలి రోజైన ఎంగిలిపూల బతుకమ్మ వేడుకలను గ్రామ మహిళలు భక్తిశ్రద్ధలతో, ఉత్సాహంగా నిర్వహించారు.ఈ సందర్భంగా మహిళలు వివిధ రకాల రంగురంగుల పూలతో బతుకమ్మలను అందంగా పేర్చి, గ్రామంలోని శివాలయం వద్దకు చేరుకున్నారు. సంప్రదాయబద్ధంగా బతుకమ్మలకు పూజలు నిర్వహించి, వాటి చుట్టూ చేరి బతుకమ్మ పాటలు పాడుతూ, ఆటపాటలతో సంబరాలు చేసుకున్నారు. మహిళల సందడి, బతుకమ్మ పాటలతో శివాలయ పరిసరాలు పండుగ శోభను సంతరించుకున్నాయి.ప్రకృతిలో లభించే వివిధ రకాల పూలను పూజిస్తూ ప్రకృతిని ఆరాధించడం బతుకమ్మ పండుగ ప్రత్యేకత. మహిళల ఐక్యతకు, తెలంగాణ ఆడపడుచుల సంస్కృతి, సంప్రదాయాలకు ప్రతీకగా నిలిచే ఈ పండుగను గ్రామ మహిళలు ఆనందోత్సాహాల మధ్య జరుపుకున్నారు. బతుకమ్మ వేడుకల్లో మహిళలు పెద్ద సంఖ్యలో పాల్గొనడంతో నూతనకల్ గ్రామంలో పండుగ వాతావరణం నెలకొంది.

రిపోర్టర్: తలారి శివకుమార్, మేడ్చల్.