ఈ నెల 5 నుండి  13 రోజుల పాటు సదరం క్యాంపులు

సూర్య , మంచిర్యాల జిల్లా ప్రతినిధి :

మంచిర్యాల జిల్లా కలెక్టర్ ఆదేశాల మేరకు జిల్లాలోని దివ్యాంగులకు ఈ నెలలో యుడిఐడి/సదరం వైద్య శిబిరాలను నిర్వహించనున్నట్లు జిల్లా గ్రామీణాభివృద్ధి అధికారి (డిఆర్డిఓ) కిషన్  ఒక ప్రకటనలో తెలిపారు.

ప్రభుత్వ జనరల్ ఆసుపత్రి, మంచిర్యాలలో ఈ శిబిరాలు జరుగుతాయని పేర్కొన్నారు. దివ్యాంగత్వ రకాన్ని బట్టి తేదీల వారీగా శిబిరాల వివరాలు ఇలా ఉన్నాయి. అక్టోబర్ 5, 8 తేదీల్లో వినికిడి లోపం, మాట్లాడటం, భాష లోపం ఉన్నవారికి అక్టోబర్ 6, 7 తేదీల్లో మానసిక అనారోగ్యం, మేధో వైకల్యం ఉన్నవారికి అక్టోబర్ 9, 12, 13, 14, 15, 24, 26 తేదీల్లో లోకోమోటర్, ఆర్థో వైకల్యం ఉన్నవారికి, అక్టోబర్ 27న కొడవలి కణం, సికిల్ సెల్ వ్యాధి, హిమోఫీలియా బాధితులకు, అక్టోబర్ 28న తక్కువ దృష్టి , దృష్టి లోపం, తలసేమియా బాధితులకు వైద్య శిబిరాలు నిర్వహించనున్నారు. సెప్టెంబర్ 30వ తేదీ వరకు మీ సేవా కేంద్రాల్లో యుడిఐడి/సదరం పోర్టల్ లో కొత్తగా నమోదు చేసుకున్న అభ్యర్థులకు ఫోన్ ద్వారా సమాచారం ఇవ్వడం జరుగుతుందని తెలిపారు. సంబంధిత పత్రాలతో నిర్ణీత తేదీలో ప్రభుత్వ జనరల్ ఆసుపత్రికి హాజరు కావాలని, ఈ అవకాశాన్ని దివ్యాంగులు సద్వినియోగం చేసుకోవాలని జిల్లా గ్రామీణాభివృద్ధి అధికారి కిషన్ కోరారు.