మహిళలకు ఉచిత వృత్తి శిక్షణ కేంద్రాలు ఏర్పాటు చేయాలి: కె. సుజాత
హైదరాబాద్: బీసీ, ఎస్సీ, ఎస్టీ చైతన్య వేదిక తెలంగాణ రాష్ట్ర కార్యాలయంలో ఆదివారం రాష్ట్ర అధ్యక్షురాలు కె. సుజాత అధ్యక్షతన సమావేశం నిర్వహించారు.
ఈ సందర్భంగా కె. సుజాత మాట్లాడుతూ మహిళలు ఆర్థికంగా స్వయం సమృద్ధి సాధించేందుకు రాష్ట్రవ్యాప్తంగా ఉచిత వృత్తి శిక్షణ కార్యక్రమాలు నిర్వహించాలని కోరారు. ముఖ్యంగా మహిళలకు టైలరింగ్, బ్యూటీషియన్, మగ్గం తదితర వృత్తి విద్యల్లో ఉచిత శిక్షణ అందించేలా శిక్షణా కేంద్రాలను ఏర్పాటు చేయాలని ప్రభుత్వాన్ని కోరారు.
మహిళలకు శిక్షణ అందించడం ద్వారా వారు స్వయం ఉపాధి పొందడంతో పాటు కుటుంబ ఆర్థిక పరిస్థితిని మెరుగుపరుచుకునే అవకాశం ఉంటుందని ఆమె పేర్కొన్నారు. ప్రతి ప్రాంతంలో అవసరాన్ని బట్టి శిక్షణా కేంద్రాలను ఏర్పాటు చేసి, శిక్షణ పూర్తిచేసిన వారికి ఉపాధి అవకాశాలు కల్పించేందుకు చర్యలు తీసుకోవాలని కోరారు.
ఈ సమావేశంలో రాష్ట్ర ప్రధాన కార్యదర్శి దోరై మలతి, గ్రేటర్ ఉపాధ్యక్షురాలు గురు లక్ష్మి, జంగమ్మెట్ డివిజన్ ప్రధాన కార్యదర్శి స్వాతి, రాష్ట్ర కార్యనిర్వహణ అధ్యక్షుడు డి. ప్రసాద్, గ్రేటర్ ఉపాధ్యక్షుడు రాధాకృష్ణ తదితరులు పాల్గొన్నారు.
