నారాయణపేటలో ఏఎస్ రెడ్డి స్పోకెన్ ఇంగ్లీష్ తరగతులు ప్రారంభం

నారాయణపేట, సూర్యన్యూస్ : 
పోటీ ప్రపంచంలో రాణించాలంటే తప్పకుండా ఇంగ్లీష్ లో ప్రావీణ్యం కలిగి ఉండాలని టౌన్ ఎస్ఐ వెంకటేశ్వర్లు అన్నారు. నారాయణపేట పట్టణంలో సోమవారం ఏఎస్ రెడ్డి స్పోకెన్ ఇంగ్లీష్ తరగతులను ఆయన ప్రారంభించారు. ఈ సందర్భంగా మాట్లాడుతూ.. హైదరాబాద్, మహబూబ్ నగర్ ప్రాంతాల్లో ఎంతో పేరు తెచ్చుకున్న ఏఎస్ రెడ్డి తన సొంత ప్రాంతానికి సేవ చేయాలనే దృక్పథంతో ముందుకు రావడం అభినందనీయమన్నారు. ఈ ప్రాంత విద్యార్థులు ఇంగ్లీషులో ప్రావీణ్యం సంపాదించి ఉన్నత స్థానాలకు వెళ్లాలని ఆకాంక్షించడం ఆనందంగా ఉందన్నారు. విద్యార్థులు, నిరుద్యోగులు ఇంగ్లీష్ కమ్యూనికేషన్ లో శిక్షణ పొందాలని సూచించారు. ప్రభుత్వ పాఠశాలలో చదువుతున్న విద్యార్థులతో పాటు వారియర్స్ డిఫెన్స్ అకాడమీలో శిక్షణ పొందుతున్న యువతకు ఉచితంగా తరగతులు బోధిస్తున్నట్లు ప్రకటించడం హర్షనీయమన్నారు. ప్రైవేట్ విద్యాసంస్థల్లో చదివే వారికి తక్కువ ఫీజుతో శిక్షణ ఇస్తున్నట్లు పేర్కొన్నారు. కార్యక్రమంలో లయన్స్ క్లబ్ అధ్యక్షులు రవికుమార్ గౌడ్, నిర్వాహకులు యాద్గీర్ నారాయణరెడ్డి, లయన్ కన్న జగదీష్, డిఫెన్స్ అకాడమీ డైరెక్టర్ డాక్టర్ ఆంజనేయులు, లయన్ శాంత, చక్రవర్తి పాల్గొన్నారు.
-- రాజేష్ కుమార్, సూర్య రిపోర్టర్ నారాయణపేట.