కొండా లక్ష్మణ్ బాపూజీ కుమార్తెకు ఎమ్మెల్సీ పదవి?

గవర్నర్ కోటా ఎమ్మెల్సీగా పవిత్రవాణి పేరు పరిశీలన

సిరిసిల్ల సభలో పద్మశాలి వర్గానికి ఇచ్చిన హామీ మేరకు కాంగ్రెస్ అడుగులు

తెలంగాణ ఉద్యమకారుల కుటుంబాలకు ప్రాధాన్యం ఇస్తున్న రేవంత్ సర్కార్

నవంబర్‌లో ఖాళీ కానున్న మూడు ఎమ్మెల్సీ స్థానాల్లో ఒకటి ఖరారు చేసే యోచన

తెలంగాణ బ్యూరో, ప్రతినిధి:
తెలంగాణలో త్వరలో ఖాళీ కానున్న గవర్నర్ కోటా ఎమ్మెల్సీ స్థానాల భర్తీపై కాంగ్రెస్ పార్టీ కసరత్తు ముమ్మరం చేసింది. తెలంగాణ ఉద్యమ పితామహుల్లో ఒకరైన కొండా లక్ష్మణ్ బాపూజీ కుమార్తె పవిత్రవాణి పేరును ఓ స్థానానికి పరిశీలిస్తున్నట్లు విశ్వసనీయ వర్గాల ద్వారా తెలుస్తోంది. పద్మశాలి సామాజిక వర్గానికి చెందిన ఆమె, ప్రస్తుతం వైద్యవృత్తిలో ఉన్నారు. సిరిసిల్ల సభలో ముఖ్యమంత్రి రేవంత్ రెడ్డి ఇచ్చిన హామీ మేరకు ఒక ఎమ్మెల్సీ సీటును పద్మశాలి వర్గానికి కేటాయిస్తామని ప్రకటించిన నేపథ్యంలో ఈ పరిణామం ప్రాధాన్యం సంతరించుకుంది. తెలంగాణ రాష్ట్ర సాధన కోసం 1969 ఉద్యమ సమయంలో మంత్రి పదవికి రాజీనామా చేసిన తొలి నేతగా కొండా లక్ష్మణ్ బాపూజీ చరిత్రలో నిలిచారు. అయితే, రాష్ట్రం ఏర్పడ్డాక ఉద్యమకారుల కుటుంబాలను గత బీఆర్ఎస్ ప్రభుత్వం విస్మరించిందని రేవంత్ రెడ్డి ప్రతిపక్ష నేతగా ఉన్నప్పటి నుంచీ ఆరోపిస్తున్నారు. సీఎం అయ్యాక ఆ దిశగా చర్యలు చేపట్టారు. ప్రొఫెసర్ కోదండరామ్‌ను ఎమ్మెల్సీగా, శ్రీకాంతాచారి తల్లి శంకరమ్మ, చాకలి ఐలమ్మ మనుమరాలిని మహిళా కమిషన్ సభ్యులుగా నియమించారు. ఈ క్రమంలోనే తాజాగా బాపూజీ కుమార్తెకు అవకాశం ఇవ్వాలనే ప్రతిపాదన వచ్చినట్లు సమాచారం. నవంబర్ 14న ఎమ్మెల్సీలు గోరటి వెంకన్న, బస్వరాజు సారయ్య, బొగ్గారపు దయానంద్‌ల పదవీకాలం ముగియనుంది. ఈ మూడు స్థానాల్లో ఒకదాన్ని పద్మశాలి వర్గానికి కేటాయించనున్నారు. పవిత్రవాణిని ఎంపిక చేయడం ద్వారా ఉద్యమ కుటుంబానికి గౌరవం కల్పించడంతో పాటు, బీసీలు, మహిళల్లో పార్టీకి సానుకూల వాతావరణం ఏర్పడుతుందని కాంగ్రెస్ అధిష్ఠానం భావిస్తున్నట్లు తెలుస్తోంది. అయితే, ఇదే సీటు కోసం పార్టీలోని ఇతర పద్మశాలి నేతలు కూడా గట్టిగా ప్రయత్నిస్తున్నారు. మాజీ ఎమ్మెల్యే ఈరవత్రి అనిల్, నల్గొండ డీసీసీ అధ్యక్షుడు కైలాష్ నేత వంటి వారి పేర్లు కూడా చర్చలో ఉన్నాయి. అన్ని సమీకరణాలను బేరీజు వేసుకుని సీఎం రేవంత్ రెడ్డి, పార్టీ హైకమాండ్ తుది నిర్ణయం తీసుకోనుంది.