మేడ్చల్లో కలకలం.... ఎన్ఎస్ఆర్ కాలేజీ సమీపంలో గుర్తుతెలియని వ్యక్తి మృతదేహం లభ్యం
మేడ్చల్, మేజర్ న్యూస్ (సెప్టెంబర్ 26):మేడ్చల్ పోలీస్ స్టేషన్ పరిధిలోని స్థానిక ఎన్ఎస్ఆర్ కాలేజీ సమీప ప్రాంతంలో గుర్తుతెలియని వ్యక్తి మృతదేహం లభ్యం కావడం స్థానికంగా తీవ్ర కలకలం రేపింది. ఉదయం సమయంలో అటుగా వెళ్తున్న కొందరు స్థానికులు మృతదేహాన్ని గుర్తించి వెంటనే పోలీసులకు సమాచారం అందించారు. ఈ సమాచారం అందుకున్న వెంటనే మేడ్చల్ పోలీసులు హుటాహుటిన ఘటనా స్థలానికి చేరుకుని పరిస్థితిని సమీక్షించారు. మృతదేహం ఉన్న ప్రదేశాన్ని పరిశీలించి చుట్టుపక్కల ఎలాంటి ఆధారాలు లభిస్తాయనే కోణంలో క్షుణ్ణంగా తనిఖీలు నిర్వహించారు.
పోలీసులు జరిపిన ప్రాథమిక విచారణలో మరియు లభించిన ఆధారాల ద్వారా మృతుడిని ఛత్తీస్గఢ్ రాష్ట్రానికి చెందిన చంద్ర కృష్ణచంద్రగా గుర్తించడం జరిగింది. ఈ ఘటనపై కేసు నమోదు చేసుకున్న పోలీసులు మృతుడి కుటుంబ సభ్యులకు లేదా బంధువులకు సమాచారం అందించేందుకు ప్రయత్నాలు ప్రారంభించారు. మరణానికి అసలు కారణాలు ఏమిటనే దానిపై స్పష్టత రావాల్సి ఉంది. మృతదేహాన్ని పోస్టుమార్టం నిమిత్తం స్థానిక ప్రభుత్వ ఆసుపత్రికి తరలించినట్లు ఎస్సై మహేందర్ రెడ్డి తెలిపారు.ఈ సంఘటనకు సంబంధించి పోస్టుమార్టం నివేదిక వచ్చిన తర్వాతే మృతికి గల అసలు కారణాలు పూర్తిగా బయటపడతాయని పోలీసులు వెల్లడించారు. ఛత్తీస్గఢ్ నుండి ఇక్కడికి వలస వచ్చి ఏ పని నిమిత్తం నివసిస్తున్నారనే కోణంలోనూ, అనుమానాస్పద పరిస్థితులపై పోలీసులు ఆరా తీస్తున్నారు. స్థానికంగా భయాందోళనలు నెలకొన్న నేపథ్యంలో శాంతిభద్రతల పరిరక్షణకు తగిన చర్యలు తీసుకుంటున్నామని, ఈ ఘటనపై అన్ని కోణాల్లోనూ సమగ్రంగా దర్యాప్తు కొనసాగుతోందని ఎస్సై మహేందర్ రెడ్డి స్పష్టం చేశారు.రిపోర్టర్ తలారి శివకుమార్.
