కొండా లక్ష్మణ్ బాపూజీ ని తెలంగాణ జాతిపితగా ప్రకటించాలి

కొండా  లక్ష్మణ్ బాపూజీ ని  తెలంగాణ 
జాతిపితగా ప్రకటించాలి 
.. డాక్టర్ రాజేశ్వర ప్రసాద్..

పరకాల, సెప్టెంబర్ 27, మేజర్ న్యూస్

మూడు తరాల తెలంగాణ స్వాతంత్ర్య పోరాటంలో ముందు వరుసలో నిలిచిన స్వాతంత్ర్య సమరయోధులు, మాజీమంత్రి కొండా లక్ష్మణ్ బాపూజీని తెలంగాణ జాతిపితగా ప్రకటించాలని పరకాల పోపా అధ్యక్షుడు డాక్టర్ పి. రాజేశ్వరప్రసాద్ డిమాండ్ చేశారు. తెలంగాణ కోసం తన మంత్రి పదవిని త్యాగం చేసిన బాపూజీ కి సముచిత గౌరవం కల్పించడంలో భాగంగా మామునూరు విమానాశ్రయానికి ఆయన పేరు పెట్టాలని కోరారు. స్వాతంత్ర్య సమరయోధుడు మాజీ మంత్రి కొండా లక్ష్మణ్ బాపూజీ 111వ జయంతి సందర్భంగా పరకాల పట్టణంలో ఆయన విగ్రహానికి పూలమాలలు వేసి నివాళులర్పించారు. స్థానిక బస్సు డిపో జంక్షన్ లోగల ఆయన విగ్రహం వద్ద పట్టణ పద్మశాలి సంఘం ఆధ్వర్యంలో జయంతి కార్యక్రమాన్ని నిర్వహించారు. పద్మశాలి సంఘం అధ్యక్షుడు బాసని దయాకర్ అధ్యక్షతన జరిగిన  కార్యక్రమంలో ముఖ్య అతిథిగా పాల్గొన్న డాక్టర్ రాజేశ్వరప్రసాద్ మాట్లాడుతూ పదవులు అధికారాల కంటే ప్రజల హక్కులకే ప్రాధాన్యతనిస్తూ తన జీవితాన్ని ప్రజా సేవకు అంకితం చేసిన బాపూజీ పోరాట స్ఫూర్తి నేటి తరానికి మార్గదర్శకమని అన్నారు. ప్రత్యేక ఆహ్వానితులుగా హాజరైన కొండా లక్ష్మణ్ బాపూజీ గ్లోబల్ ఫెడరేషన్ హనుమకొండ జిల్లా కన్వీనర్, సీనియర్ జర్నలిస్ట్ 
మెండు రవీందర్ మాట్లాడుతూ దేశ స్వాతంత్రోద్యమంలో చురుకైన పాత్ర పోషించి మూడు తరాల తెలంగాణ విముక్తి పోరాటాల్లో ముందు వరసలో నిలిచిన లక్ష్మణ్ బాపూజీ కి కేంద్ర ప్రభుత్వం అత్యున్నతమైన భారతరత్న పురస్కారం ప్రకటించాలని కోరారు. నిస్వార్థ ప్రజా సేవకు విలువలతో కూడిన రాజకీయ జీవితానికి అణగారిన వర్గాల అభ్యున్నతికి ఆయన జీవితం గొప్ప ఆదర్శనీయమని రవీందర్ పేర్కొన్నారు. అనంతరం పేదలకు అన్నదానం చేశారు. పద్మశాలి సంఘం అధ్యక్షుడు దయాకర్ అధ్యక్షతన జరిగిన  కార్యక్రమంలో ట్రస్టు బోర్డు అధ్యక్షుడు డాక్టర్ మంత్రి కాశయ్య మార్కండేయ ఆర్థిక సంఘం అధ్యక్ష కార్యదర్శులు రాచర్ల అశోక్ , తవుటం మధుసూదన్ మాజీ కౌన్సిలర్లు పొరండ్ల సంతోష్, చిదురాల దేవేందర్, పోపా ప్రధాన కార్యదర్శి దుంపేటి నాగరాజు చేనేత సంఘం ఉపాధ్యక్షుడు దార్న వేణుగోపాల్, ట్రస్ట్ బోర్డ్ సభ్యుడు దార్న కుమారస్వామి, నడికుడ మండల అధ్యక్షుడు గాదె శంకరయ్య తదితరులు పాల్గొన్నారు.