కేసీఆర్ ప్రజల గుండెల్లో ఉన్నారు.. రెండేళ్లలో మళ్లీ మా పాలనే: కేటీఆర్
హైదరాబాద్: మాజీ ముఖ్యమంత్రి కేసీఆర్ ప్రజల గుండెల్లో ఉన్నారని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. కేసీఆర్ ముఖ్యమంత్రిగా కొనసాగి ఉంటే శంషాబాద్ విమానాశ్రయానికి మెట్రో రైలు వచ్చేదని పేర్కొన్నారు. తమ ప్రభుత్వ హయాంలో ఎయిర్పోర్టు మెట్రోకు సంబంధించిన టెండర్ల ప్రక్రియ పూర్తయిందని, కాంగ్రెస్ ప్రభుత్వం అధికారంలోకి వచ్చిన తర్వాత ఆ ప్రాజెక్టును రద్దు చేసిందని ఆరోపించారు.
మూసీ అభివృద్ధి పేరుతో ఇళ్లను కూల్చివేయాల్సిన అవసరం ఏముందని కేటీఆర్ ప్రశ్నించారు. ఇళ్లు కూల్చకుండా మూసీ అభివృద్ధి చేయడం ప్రభుత్వానికి చేతకాదా అని నిలదీశారు. కాంగ్రెస్ ప్రభుత్వం మూడేళ్ల పాలనలో హైదరాబాద్లో ఒక్క ఇల్లైనా నిర్మించిందా అని ప్రశ్నించారు. ప్రభుత్వ లక్ష్యం భూములు అమ్ముకోవడమేనని ఆయన ఆరోపించారు.
కాంగ్రెస్ ప్రభుత్వ పాలనలో తొలి అర్ధభాగం పూర్తయిందని, మరో రెండేళ్లలో తమ ప్రభుత్వం తిరిగి వస్తుందని కేటీఆర్ వ్యాఖ్యానించారు. ప్రస్తుతం రెచ్చిపోతున్న వారిని వదిలిపెట్టబోమని హెచ్చరించారు. ‘‘వానపాములు కూడా బుసలు కొడుతున్నాయి. సమయం వచ్చినప్పుడు ఎవరినీ వదిలిపెట్టం’’ అని కేటీఆర్ వ్యాఖ్యానించారు.
