కరీంనగర్ ఆర్టీసీ బస్టాండ్లో అంబేద్కర్ విగ్రహావిష్కరణ
అంబేద్కర్ విగ్రహాన్ని ప్రారంభించిన మంత్రి పొన్నం ప్రభాకర్
కరీంనగర్, సెప్టెంబర్ 26, సూర్య ప్రతినిధి:
కరీంనగర్ ఆర్టీసీ బస్టాండ్లో ఏర్పాటు చేసిన భారత రాజ్యాంగ నిర్మాత, భారతరత్న డాక్టర్ బి.ఆర్. అంబేద్కర్ విగ్రహాన్ని రాష్ట్ర రవాణా శాఖ మంత్రి పొన్నం ప్రభాకర్ శనివారం ఘనంగా ప్రారంభించారు. ఈ సందర్భంగా అంబేద్కర్ విగ్రహానికి పూలమాల వేసి నివాళులర్పించారు.
సామాజిక సమానత్వం, అణగారిన వర్గాల అభ్యున్నతి, ప్రజాస్వామ్య విలువల పరిరక్షణ కోసం డాక్టర్ బి.ఆర్. అంబేద్కర్ చేసిన కృషి చిరస్మరణీయమని ఈ సందర్భంగా నాయకులు పేర్కొన్నారు. ఆయన ఆశయాలను స్ఫూర్తిగా తీసుకుని సమాజంలోని అన్ని వర్గాల అభివృద్ధికి కృషి చేయాల్సిన అవసరం ఉందని తెలిపారు.
కరీంనగర్ ఆర్టీసీ బస్టాండ్కు వచ్చే ప్రయాణికులు, ప్రజలకు అంబేద్కర్ విగ్రహం స్ఫూర్తిదాయకంగా నిలుస్తుందని నాయకులు పేర్కొన్నారు. బస్టాండ్ అభివృద్ధి, ప్రయాణికులకు మెరుగైన సౌకర్యాల కల్పనకు ప్రభుత్వం ప్రాధాన్యం ఇస్తోందని తెలిపారు.
ఈ కార్యక్రమంలో రాష్ట్ర మంత్రి వాకిటి శ్రీహరి, ఎమ్మెల్యేలు మేడిపల్లి సత్యం, కవ్వంపల్లి సత్యం, కాంగ్రెస్ నాయకులు, కార్యకర్తలు, ఆర్టీసీ అధికారులు, సిబ్బంది, ప్రజలు పెద్ద సంఖ్యలో పాల్గొన్నారు. ఈ సందర్భంగా పలువురు నాయకులు డాక్టర్ బి.ఆర్. అంబేద్కర్ సేవలను స్మరించుకుంటూ ఆయనకు ఘన నివాళులు అర్పించారు.
